سەنات دەپۋتاتى مۇرات باقتيار ۇلى «رۋحاني جاڭعىرۋ» باعدارلاماسى اياسىنداعى عىلىمي جانە كوركەم ادەبيەتتىڭ اۋدارما ءىسىن توقتاتپاۋدى سۇرادى. سەناتور ۇكىمەت باسشىسىنا جولداعان ساۋالىندا وسىعان دەيىن ۇلتتىق باعدارلاما اياسىندا جۇمىس ىستەپ كەلگەن «ۇلتتىق اۋدارما بيۋروسى» قوعامدىق قورى قىزمەتىن ەلىمىزدىڭ ءبىر توپ بەلگىلى عالىمدارىمەن بىرگە جان-جاقتى تالداۋ جۇرگىزگەنىن اتاپ ءوتتى.

– كوپتەگەن سىني پىكىرلەرگە قاراماستان تالداۋ جانە ساراپتاۋ بارىسىندا از عانا ۋاقىت ىشىندە قىرۋار جۇمىس جاسالعانىنا كوز جەتكىزدىك. اتالمىش جوبانىڭ ارقاسىندا قازاقستاندىق گۋمانيتارلىق ءبىلىم مازمۇنى تولىقتاي جاڭارىپ، جاڭا دەڭگەيگە كوتەرىلدى، – دەدى سەناتور.

سەنات دەپۋتاتى «100 جاڭا وقۋلىق» جوباسىن «بولاشاق» باعدارلاماسىنىڭ اۋقىمدى جالعاسىنا تەڭەدى. اتالمىش باعدارلاما اياسىندا وسى ۋاقىتقا دەيىن قازاق تىلىندە بولماعان، مۇلدە جاڭا سالالاردى تانىستىردى.

«سوندىقتان دا ەلىمىزدىگى جوعارى وقۋ ورىندارىندا وقيتىن ستۋدەنتتەردىڭ 70%-ى مەملەكەتتىك تىلدە ءبىلىم الاتىندىعىن ەسكەرە وتىرىپ، جوبا اياسىندا جيناقتالعان قىرۋار ءبىلىم مەن تاجىريبەنى جوعالتىپ الماۋ ءۇشىن ەلىمىزدەگى عىلىمي جانە كوركەم اۋدارما جۇمىسىن جالعاستىرۋ قاجەت دەپ سانايمىز» - دەدى مۇرات باقتيار ۇلى.

دەپۋتات قازاق تىلىندەگى «100 جاڭا وقۋلىق» جوباسى «جاڭا ءبىلىم» دەگەن جالپى اتاۋمەن جالعاسۋى ءتيىس دەپ ەسەپتەيدى. جانە ونىڭ اۋقىمىن كەڭەيتۋ ماقساتىندا جىل سايىن اۋدارىلىپ باسىلاتىن كىتاپتار تاقىرىبىن ءۇش نەگىزگى باعىت: جوعارى وقۋ ورىندارىنا ارنالعان وقۋ قۇرالدارى، الەمدىك كوركەم ادەبيەت ۇلگىلەرى، پۋبليسيستيكالىق جانە ىسكەرلىك ادەبيەت ۇلگىلەرى بويىنشا توپتاستىرۋدى ۇسىنىپ وتىر.

وسى ۋاقىتقا دەيىن «رۋحاني جاڭعىرۋ» باعدارلاماسىنىڭ نەگىزگى تارماقتارىنىڭ ءبىرى «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىندا 2017 جىلدان بەرى 77 وقۋلىق اۋدارىلىپ وقۋ ورىندارىنا تاراتىلعان بولاتىن. قالعان 23 وقۋلىقتى اۋدارۋ، باسۋ جانە تاراتۋ جۇمىستارى بيىلعى جىلدىڭ اياعىنا دەيىن اياقتاۋ جوسپارلانىپ وتىر.