ول تۇركىستان قالاسىنىڭ وتاندىق تۋريزم سالاسىنداعى رولىنە نازار اۋدارىپ، وسى باعىتتا مامان دايارلايتىن ءبىلىم ورداسىنىڭ ماڭىزى زور ەكەنىن ايتتى. دەگەنمەن، دەپۋتات ەلباسىنىڭ باستاماسىمەن جانە مەملەكەت باسشىسىنىڭ تاپسىرماسىمەن اشىلعان ۋنيۆەرسيتەت عيماراتتارىنىڭ ءالى كۇنگە دەيىن جابدىقتالماعانىنا قىنجىلىسىن ءبىلدىردى.
– ازىرگە بۇل داۋ-دامايدان پاندەميا قۇتقارىپ تۇر دەۋگە بولادى. سەبەبى، ستۋدەنتتەر ىندەتكە بايلانىستى قاشىقتان ءبىلىم الىپ جاتىر. ءقازىر ءبىلىم جانە عىلىم مينيسترلىگى ءداستۇرلى ءبىلىم الۋعا كوشۋ ماسەلەسىن قوزعاپ جاتقانى بەلگىلى. مۇنداي جاعدايدا بۇل ۋنيۆەرسيتەتتىڭ ستۋدەنتتەرى نە ىستەيدى؟، – دەدى سەناتور.
دەپۋتاتتىڭ ايتۋىنشا، تۇركىستان وبلىسىنىڭ اكىمدىگى وقۋ ورنىنا ارنايى 4 عيمارات بولگەن. ونىڭ ەكەۋى جاڭا بولسا، ەكەۋى جوندەۋدەن وتكىزىلگەن بۇرىنعى نىساندار. سونداي-اق، قازىرگى تاڭدا اتالعان ءبىلىم وشاعىندا 588 ازامات 6 باعىت بويىنشا ءبىلىم الىپ جاتقانىن اتاپ وتكەن ءجون.
وسى ماسەلەنى وڭتايلى شەشۋ ءۇشىن سەناتور ءتيىستى قاراجات ءبولۋدى سۇرادى.
– ءقازىر حالىقارالىق تۋريزم جانە مەيماندوستىق ۋنيۆەرسيتەتى تولىق جۇمىس ىستەپ تۇرعان جوق. وقۋ ۇدەرىسى تەك ءبىرىنشى كۋرستا عانا جۇرگىزىلىپ جاتىر. سونى ەسكەرە وتىرىپ، 4 نەگىزگى عيماراتتىڭ بىرەۋىن جابدىقتاۋعا قاجەتتى 577 ميلليون تەڭگەنى 2021 جىلدىڭ بيۋدجەتىندە قاراستىرۋدى سۇرايمىز، – دەدى ءالىمجان قۇرتايەۆ.
سونىمەن قاتار دەپۋتاتتىق ساۋالدا قازاقتىڭ داڭقتى پالۋانى قاجىمۇقان مۇڭايتپاس ۇلىنىڭ 150 جىلدىق مەرەيتويىنا وراي سالىنۋعا ءتيىس مەموريالدىق كەشەن قۇرىلىسىنا دا قارجى بولىنبەگەنى ايتىلدى.
– مەرەيتويعا وراي تۇركىستان وبلىسى، ورداباسى اۋدانىندا قاجىمۇقان مۇڭايتپاس ۇلىنىڭ اتىنا مەموريالدىق كەشەن سالۋ جوسپارلانعان. نىساننىڭ قۇرىلىس جۇمىستارى بيىلعى قاراشا ايىندا باستالىپ، كەشەن 2021 جىلدىڭ قازان ايىندا پايدالانۋعا بەرىلۋى كەرەك ەدى. الايدا، قۇرىلىس جۇمىستارىن باستاۋ ءۇشىن ءتيىستى قاراجات قاراستىرىلماعان»، – دەگەن سەنات دەپۋتاتى كەلەسى جىلدىڭ بيۋدجەتىندە وسى ماسەلەنى دە ەسكەرۋدى سۇرادى.
ساۋالعا ءالىمجان قۇرتايەۆپەن بىرگە سەناتور ءالي بەكتايەۆ قول قويعان.
