ەڭ باستىسى، شىندىقتى جايىپ سالعانى قاشان بولىپ ەدى؟
- الىسقا بارماي-اق، وتكەن جىلى ارىستا قويما جارىلعاندا حالىق ءوزىن ءوز كۇشىمەن كوشىردى ەمەس پە؟ ودان دا اسقان سوراقىلىق بولعان، مىسالى. ەشقانداي كوروناۆيرۋسسىز-اق ءبىزدىڭ دارىگەرلەر شىمكەنت اۋرۋحانالارىندا 150-گە جۋىق بالاعا ۆيچ-ينفەكسيا جۇقتىرىپ العان. ال جەرگىلىكتى بيلىك بۇل جاعدايدى جۇرتشىلىقتان جاسىرىپ قالۋعا بارىن سالعان بولاتىن.
ال ەندى قازاقستاننىڭ ءبىر جەرىندە كوروناۆيرۋس ىندەتى باستالعان جاعدايدا ودان ارى قاراي نە بولۋى مۇمكىن ەكەنىن كوز الدىمىزعا ەلەستەتەيىك. اۋرۋحاناعا كەلگەن ادامعا دياگنوزدىڭ دۇرىس قويىلماۋى قاتەرى ءبىزدىڭ ەلدە وتە جوعارى، ويتكەنى قازاقستاندىق مەديسينانىڭ دەڭگەيى كاتاستروفالىق جاعدايدا، اسىرەسە شالعاي وڭىرلەردە.
قاتە دياگنوز، كارانتيننىڭ جوقتىعى، گيگيەنا دەڭگەيىنىڭ تومەندىگى (كەي جەرلەردە ءتىپتى تازا سۋ جوق، دارەتحانالار دالادا) ۇلكەن قيىندىقتارعا اكەلەدى.
قازاقستاندا ءقاۋىپتى ينفەكسيالارمەن جۇمىس ىستەۋگە ۇيرەتىلگەن قانشا دارىگەر مەن مەدبيكە بار؟ جۇڭگو بىرنەشە مىڭداعان اسكەري دارىگەرلەردى جيناپ الىپ، ۋحانعا جونەلتتى. ال قازاقستان نە ىستەمەك؟
ال بيلىك قوعامعا بۇل اقپاراتتى قالاي جەتكىزبەك؟ بۇعان دەيىنگى توتەنشە جاعدايلار كورسەتكەندەي، ءبىزدىڭ شەنەۋنىكتەردىڭ مۇنداي جاعدايدا ارەكەت قىلۋدىڭ قالىپتاسقان ءداستۇرى بار.
بىرىنشىدەن، تۇك بولماعانداي ۇندەمەي وتىرۋ. ەگەر اقپارات الەۋمەتتىك جەلىلەرگە تاراپ كەتسە، ءقاۋىپتى تومەن ەتىپ كورسەتۋگە تىرىسۋ مەن "جالعان اقپارات تاراتقانداردى" قورقىتۋعا كىرىسەدى. ال جاعداي ابدەن ۋشىققاندا بولعان جاعدايعا جاۋاپكەرشىلىكتى بىر-بىرىنە ارتۋ ءۇشىن جانتالاسا باستايدى.
كوروناۆيرۋس ىندەتى بۇرق ەتە قالعان جاعدايدا تۋىندايتىن ۇلكەن پروبلەمانىڭ ءبىرى – بيلىكتىڭ ءىسى مەن سوزىنە حالىقتىڭ سەنبەۋىنەن شىعادى.
سەنىم جوق جەردە مەملەكەت پەن قوعام بىرىگىپ، ىندەتتىڭ تارالۋىن توقتاتۋعا قاجەتتى ۇيلەسىمدى جۇمىس جۇرگىزە المايدى. بيلىككە دەگەن سەنىمنىڭ ابدەن جوعالعانىنىڭ ءبىر دالەلى سول، حالىق سوڭعى جىلدارى بالالارعا ۆاكسينا سالعىزۋدان باس تارتا باستادى. ناتيجەسىندە ەلدە قىزىلشا ىندەتى كۇرت اسقىنىپ كەتتى.
شىندىقتى جاسىرۋعا تىرىسۋ – ەلدە ۇرەي تۋعىزادى. ىندەت تاراعان وڭىرلەردىڭ تۇرعىندارى باسقا وڭىرلەردەگى تۋىستارىنا قاراي كوشىپ كەتۋگە تىرىسادى.
ءتىپتى ول ايماقتى جاۋىپ تاستاعان كۇننىڭ وزىندە بىزدەگى جەمقورلىق جاعدايىندا تامىر-تانىسى مەن اقشاسىن پايدالانىپ، "قورعانىس قامالىن" بۇزىپ-جارىپ وتە شىعاتىن دوكەيلەر بولمايتىنىنا كىم كەپىل؟
وتكەندە عانا زايسان تۇرعىندارى نەلىكتەن دۇرلىكتى؟ كوروناۆيرۋس جۇقتىرعان جۇڭگو ازاماتتارىن اكەپ تاستاۋى مۇمكىن دەپ قاۋىپتەندى. قوعام بيلىكتىڭ سالعىرتتىعى، ءوز حالقىنىڭ الدىنداعى جاۋاپسىزدىعى مەن وتىرىك ايتۋىنا بىردەن قارسىلىق تانىتۋعا دايىن ەكەنىن كورسەتتى. وسىلايشا، بيلىك كوروناۆيرۋستىڭ تارالۋىمەن ءتيىمدى كۇرەسە الماسا – بۇل دا الەۋمەتتىك نارازىلىققا اكەپ سوعۋى مۇمكىن.
ەلدە جاپپاي دارى-دارمەك مەن مەديسينالىق ماسكالار تاۋسىلىپ قالادى. سوسىن دۇكەن سورەلەرىندە ازىق-تۇلىك تاپشىلىعى تۋىندايدى، باعالار كۇرت قىمباتتاپ الەۋمەتتىك تولقىنىس تۋادى. ءبىز نەگىزىنەن ءبارىن، ازىق-تۇلىكتەن باستاپ دارى-دارمەككە دەيىن سىرتتان تاسيتىن مەملەكەتپىز.
ءبىزدىڭ ەكسپورتقا شىعاتىن نەگىزگى تاۋارىمىز – مۇناي مەن قاشقىن شەنەۋنىك-وليگارحتار.
وليگارحتاردى قويشى، ەگەراكي ىندەت قازاقستاننىڭ مۇناي-گاز وندىرەتىن وڭىرلەرىندە تاراسا – قاشاعان، تەڭىز جانە قاراشىعاناقتا شيكىزات ءوندىرىسى توقتايدى.
ارينە، بەتىن اۋلاق قىلسىن، بۇل جايسىز سەنارييلەردىڭ ءبىرى عانا.
ءبىراق تاعى ءبىر قايتالاپ ايتايىن، كەز-كەلگەن قاۋىپپەن ءتيىمدى كۇرەسۋگە قاجەتتى ەڭ ءبىرىنشى جانە ەڭ ماڭىزدى رەسۋرس – بيلىك پەن قوعام اراسىنداعى سەنىم، - دەپ پايىمداپتى دوسىم ساتپايەۆ.
