"مۇحتار جاكىشيەۆ پەن ماكس بوقايەۆقا (جەر رەفورماسىنا قارسى ەرەۋىل ۇيىمداستىرعانى ءۇشىن 5 جىلعا سوتتالعان، جازاسىنىڭ 3 جىلىن وتەدى) بيلىك الدەقاشان ەركىندىك بەرۋى ءتيىس ەدى.
وسىدان بىرنەشە جىل بۇرىن جاناشىر جۇرت بيلىكتەن ءبىر قايىر كۇتىپ، جازىقسىز سوتتالعان ساياسي تۇتقىندارعا بوستاندىق بەرەدى دەپ كۇتتى. Amnesty International ۇيىمىنىڭ دەرەگىنشە بىزدەگى ساياسي تۇتقىنداردىڭ سانى 15 ادامنىڭ اينالاسىندا ەكەن.
الايدا نازاربايەۆتىڭ تۇسىندا قازاقستاننىڭ وزىق دامىعان 30 ەلدىڭ قاتارىنا كورىنگىسى كەلەتىنى ايتىلدى دا، الگى 30 ەلدىڭ ءبارى دەموكراتيالىق مەملەكەتتەر ەكەنى، ولاردا ساياسي تۇتقىندار اتىمەن جوقتىعى قاپەرگە الىنعان جوق.
نازاربايەۆتىڭ ورنىن باسقان توقايەۆتىڭ الەۋمەتتىك، ساياسي، ەكونوميكالىق سارىنداعى پوپۋليستىك مالىمدەمەلەرىنە تويعان كوپشىلىك پرەزيدەنتتىڭ سوزدەن ىسكە كوشۋىن تالاپ ەتىپ وتىر.
ساياسي تۇتقىنداردىڭ شىدەرىن شەشۋ ماسەلەسى نازاربايەۆ بيلىك تىزگىنىن تاپسىرعان 19 ناۋرىزدا-اق بەلسەندى تۇردە ايتىلا باستادى. الايدا ول تۇستا بيلىك سايلاۋدىڭ جىرىمەن مۇرنىنان شانشىلىپ ءجۇردى ءارى مۇحتار ابليازوۆپەن اراداعى اقپاراتتىق ايقاستا يتجىعىس تۇسكەنىنە جىنى ويناپ، ساياسي تۇتقىندارعا كوڭىل بولۋگە مۇرشاسى بولمادى.
بيلىك حالىقپەن ديالوگ ورناتقىسى، قازاقستاننىڭ ساياسي ءومىرىن جاڭا پاراقتان باستاعىسى كەلسە الدىمەن اباقتىدا جاتقان ساياسي تۇتقىنداردى تۇگەلدەي بوساتۋى ءتيىس.
ءدال ءقازىر بيلىك ءۇشىن دەموكراتياعا قاراي قادام جاسايتىن جانە وسى ارقىلى قوعام ىقىلاسىنا بولەنەتىن وڭتايلى ءسات.
مۇحتار جاكىشيەۆ ەركىندىككە شىعادى دەگەن بولماشى ءۇمىت بار. جاكىشيەۆكە بوستاندىق بەرمەسە بيلىك وڭباي وكىنەدى. بۇل جاڭا ساياسي الاڭ قالىپتاستىرۋعا مۇمكىندىك العان توقايەۆ پەن ونىڭ ۋازىرلەرىنىڭ ەڭ ۇلكەن قاتەلىگى رەتىندە تاريحتا قالادى.
مۇحتار جاكىشيەۆتىڭ سارجامباس كۇيگە ءتۇسىپ، تۇرمەدە توسەك تارتىپ جاتقانىنا كوپ ۋاقىت بولدى. ەگەر اباقتىدان بوساپ جاتسا، ءبىرىنشى كەزەكتە دەنساۋلىعىن تۇزەۋگە كوڭىل بولەرى انىق. ەلدەن كەتۋى دە ابدەن مۇمكىن.
ساياسي قاۋىپسىزدىك تۇرعىسىنان جاكىشيەۆكە تىم قۇرىعىندا ەم-دوم الار تۇستا قازاقستاننان تىس جەردە بولعانى ءجون" – دەگەن ەكەن vlast.kz-پەن پىكىر بولىسكەن ساتپايەۆ.
ازىرلەگەن، دۋمان بىقاي
