"Muhtar Jákishev pen Maks Boqaevqa (jer reformasyna qarsy ereýil uiymdastyrǵany úshin 5 jylǵa sottalǵan, jazasynyń 3 jylyn ótedi) bilik áldeqashan erkindik berýi tiis edi.
Osydan birneshe jyl buryn janashyr jurt bilikten bir qaiyr kútip, jazyqsyz sottalǵan saiasi tutqyndarǵa bostandyq beredi dep kútti. Amnesty International uiymynyń dereginshe bizdegi saiasi tutqyndardyń sany 15 adamnyń ainalasynda eken.
Alaida Nazarbaevtyń tusynda Qazaqstannyń ozyq damyǵan 30 eldiń qataryna kóringisi keletini aityldy da, álgi 30 eldiń bári demokratiialyq memleketter ekeni, olarda saiasi tutqyndar atymen joqtyǵy qaperge alynǵan joq.
Nazarbaevtyń ornyn basqan Toqaevtyń áleýmettik, saiasi, ekonomikalyq saryndaǵy popýlistik málimdemelerine toiǵan kópshilik Prezidenttiń sózden iske kóshýin talap etip otyr.
Saiasi tutqyndardyń shiderin sheshý máselesi Nazarbaev bilik tizginin tapsyrǵan 19 naýryzda-aq belsendi túrde aityla bastady. Alaida ol tusta bilik sailaýdyń jyrymen murnynan shanshylyp júrdi ári Muhtar Ábliazovpen aradaǵy aqparattyq aiqasta itjyǵys túskenine jyny oinap, saiasi tutqyndarǵa kóńil bólýge murshasy bolmady.
Bilik halyqpen dialog ornatqysy, Qazaqstannyń saiasi ómirin jańa paraqtan bastaǵysy kelse aldymen abaqtyda jatqan saiasi tutqyndardy túgeldei bosatýy tiis.
Dál qazir bilik úshin demokratiiaǵa qarai qadam jasaityn jáne osy arqyly qoǵam yqylasyna bólenetin ońtaily sát.
Muhtar Jákishev erkindikke shyǵady degen bolmashy úmit bar. Jákishevke bostandyq bermese bilik ońbai ókinedi. Bul jańa saiasi alań qalyptastyrýǵa múmkindik alǵan Toqaev pen onyń ýázirleriniń eń úlken qateligi retinde tarihta qalady.
Muhtar Jákishevtiń sarjambas kúige túsip, túrmede tósek tartyp jatqanyna kóp ýaqyt boldy. Eger abaqtydan bosap jatsa, birinshi kezekte densaýlyǵyn túzeýge kóńil bóleri anyq. Elden ketýi de ábden múmkin.
Saiasi qaýipsizdik turǵysynan Jákishevke tym quryǵynda em-dom alar tusta Qazaqstannan tys jerde bolǵany jón" – degen eken vlast.kz-pen pikir bólisken Sátpaev.
Ázirlegen, Dýman BYQAI
