"ول تۇستا مەن ءۇشىن ءتۇرلى وسەك-اياڭ پەن الىپ-قاشپا بولجامدارعا قاراعاندا، پرەزيدەنت توقايەۆقا قولداۋ كورسەتۋ ماڭىزدى بولدى. مەن وعان قاۋىپسىزدىك كەڭەسىنىڭ ءتوراعاسى وكىلەتتىگىن تاپسىردىم. پرەزيدەنتتىڭ شۇعىل شەشىمدەرىنىڭ ارقاسىندا وقيعانىڭ اسقىنۋىنا جول بەرمەي، ۇلكەن تراگەديانىڭ الدىن الدى"، – دەدى نازاربايەۆ ءوز سۇحباتىندا.
ەكس-پرەزيدەنت كۇشتىك قۇرىلىمدار مەن قۇقىق قورعاۋ ورگاندارىنىڭ ەلدە دايىندالعان تارتىپسىزدىكتەر تۋرالى نەلىكتەن بىلمەگەنىن جانە الدىن الماعانىن انىقتاۋ كەرەگىن مالىمدەدى.
نازاربايەۆتىڭ ايتۋىنشا، تۋىستارى ونىڭ اتىن پايدالانىپ، زاڭ بۇزسا، ءتيىستى جاۋاپقا تارتىلۋى ءتيىس.
"ءبىز ۇزاق ۋاقىتتان بەرى قازاقستاندا قۇقىقتىق مەملەكەت قۇرىپ جاتىرمىز. ونىڭ نەگىزگى ءپرينسيپى – زاڭ بارلىعىنا بىردەي. ەگەر مەنىڭ تۋىستارىم مەنىڭ سىرتىمنان اتىمدى پايدالانىپ زاڭ بۇزسا، ءتيىستى جاۋاپكەرشىلىككە تارتىلادى. كىناسى سوت ارقىلى دالەلدەنۋى قاجەت. ءار ازاماتتىڭ زاڭمەن قورعالۋىنا قۇقىعى بار ەكەنىن ۇمىتپاۋى كەرەك"، – دەدى نازاربايەۆ.
ەلباسى راحات الييەۆ تۋرالى دا ايتىپ ءوتتى. سوزىنشە، الييەۆتىڭ كۇيەۋ بالاسى بولۋى ونىڭ زاڭ اياسىندا جازاعا تارتىلۋىنا كەدەرگى بولماعان.
"بارلىعى راحات الييەۆتىڭ وقيعاسىن بىلەتىن شىعار. ول مەنىڭ قىزىمنىڭ كۇيەۋى ەدى. مەن ءۇشىن دە ۇلىم سياقتى بولاتىن، نەمەرەلەرىنىڭ اكەسى. ءبىراق مۇنىڭ بارلىعى ونىڭ زاڭسىز ارەكەتتەرىنە مەملەكەتتىڭ كوز جۇما قاراۋىنا نەگىز بولمادى. الايدا قاشىپ ۇلگەردى جانە ءومىرىنىڭ سوڭىنا دەيىن قاشىپ ءجۇردى"، – دەپ قوستى ول.
