"Ol tusta men úshin túrli ósek-aiań pen alyp-qashpa boljamdarǵa qaraǵanda, prezident Toqaevqa qoldaý kórsetý mańyzdy boldy. Men oǵan Qaýipsizdik keńesiniń tóraǵasy ókilettigin tapsyrdym. Prezidenttiń shuǵyl sheshimderiniń arqasynda oqiǵanyń asqynýyna jol bermei, úlken tragediianyń aldyn aldy", – dedi Nazarbaev óz suhbatynda.
Eks-prezident kúshtik qurylymdar men quqyq qorǵaý organdarynyń elde daiyndalǵan tártipsizdikter týraly nelikten bilmegenin jáne aldyn almaǵanyn anyqtaý keregin málimdedi.
Nazarbaevtyń aitýynsha, týystary onyń atyn paidalanyp, zań buzsa, tiisti jaýapqa tartylýy tiis.
"Biz uzaq ýaqyttan beri Qazaqstanda quqyqtyq memleket quryp jatyrmyz. Onyń negizgi printsipi – zań barlyǵyna birdei. Eger meniń týystarym meniń syrtymnan atymdy paidalanyp zań buzsa, tiisti jaýapkershilikke tartylady. Kinási sot arqyly dáleldenýi qajet. Ár azamattyń zańmen qorǵalýyna quqyǵy bar ekenin umytpaýy kerek", – dedi Nazarbaev.
Elbasy Rahat Áliev týraly da aityp ótti. Sózinshe, Álievtiń kúieý balasy bolýy onyń zań aiasynda jazaǵa tartylýyna kedergi bolmaǵan.
"Barlyǵy Rahat Álievtiń oqiǵasyn biletin shyǵar. Ol meniń qyzymnyń kúieýi edi. Men úshin de ulym siiaqty bolatyn, nemereleriniń ákesi. Biraq munyń barlyǵy onyń zańsyz áreketterine memlekettiń kóz juma qaraýyna negiz bolmady. Alaida qashyp úlgerdi jáne ómiriniń sońyna deiin qashyp júrdi", – dep qosty ol.
