2025 جىلعى 1 ماۋسىمدا قازاقستاندىقتاردىڭ زەينەتاقى جيناقتارى 22،9 ترلن تەڭگەنى قۇرادى. ونىڭ ىشىندە 4،6 ترلن تەڭگەدەن استامى سىرتتاي باسقارۋعا جاتادى. بيىلعى جىلدىڭ بەس ايداعى كىرىستىلىك دەڭگەيى ورتاشا، ال تازا ينۆەستيسيالىق تابىس 152 ملرد تەڭگەنى قۇراپ، ساراپشىلار قاۋىمى تاراپىنان قاتتى سىنعا ۇشىرادى، دەپ حابارلايدى Dalanews.kz.
ءبىراق ەكونوميست رۋسلان سۇلتانوۆتىڭ بۇل رەتتە ايتار ءوز ءۋاجى بار.
"فاكتى بويىنشا سويلەسەيىكشى. بجزق دەگەن قانداي دا ءبىر ۆەنچۋرلىق قور ەمەس، ول تابيعاتىنان كونسەرۆاتيۆتى بولىپ كەلەدى. بجزق-نىڭ نەگىزگى مىندەتى – اقشانى بارىنشا كوبەيتۋ ەمەس، ونى ساقتاۋ. سوندىقتان دا مۇنداعى اكتيۆتەردىڭ قۇرىلىمى بولجامدى تۇردە كونسەرۆاتيۆتى بولىپ كەلەدى"، - دەيدى ول.
بجزق اكتيۆتەرىنىڭ قۇرىلىمى دەمەكشى، ونداعى ۇلەس مىنانداي:
- 44% - ق ر مەملەكەتتىك قاعازدارى
- 15% - شەت مەملەكەتتەردىڭ ەگەمەندى وبليگاسيالارى
- 14% - قازاقستاندىق كومپانيالاردىڭ قاعازدارى
- 20% - سىرتقى سەنىمگەرلىك باسقارۋدا.
"كوبىرەك كىرىستى قالايسىزدار ما؟ ونداي قۇرالدار بار، ماسەلەن ماۋسىم ايىنداعى جاعداي بويىنشا: ەرىكتى زەينەتاقى سەگمەنتىندەگى جەكە باسقارۋشى كومپانيالار اينالىمىندا 62،3 ملرد تەڭگە ءجۇر. بۇل، ازىرگە جاپپاي سيپاتقا يە جايت ەمەس. ءبىراق، بۇل -تجيناقتاردى جەكەلەندىرۋدىڭ جولى، ياعني بۇل ارادا ستراتەگيانى تاڭداۋعا، كىرىستى باعالاۋعا، مەنەدجەردى وزگەرتۋگە بولادى"، - دەيدى ەكونوميست.
ونىڭ ايتۋىنشا، قازاقستانداعى جيناقتاۋ جۇيەسى تۇراقتى جانە اۋقىمدى سيپاتقا يە.
"زەينەتاقى اكتيۆتەرى ۇزاق مەرزىمدى ينۆەستيسيالار ەكەنىن ەستە ۇستاعان ءجون، سوندىقتان ولاردىڭ باسقارۋ تيىمدىلىگىن تەك جىلدىق جانە ودان دا كوپ كەزەڭدەر ەسەبىنە سۇيەنە وتىرىپ، باعالاۋعا بولادى. ءبىراق ەڭ باستىسى، ول ارادا تاڭداۋ، اقشا جانە ينفراقۇرىلىم بار. بۇل ارادا ماسەلە جۇمىس ىستەمەي جاتقاندىعىندا ەمەس، كوپتەگەن ادامدار رۇقسات ەتىلگەن ءوز قۇقىعىنىڭ پايدالانباۋىندا"، - دەيدى رۋسلان سۇلتانوۆ.
بۇعان دەيىن بجزق كەيبىر ەل ازاماتتارىنا كەزىندە تولەگەن جەكە تابىس سالىعىن قايتارا باستايتىنىن جازعانبىز. بۇل شارا قوردان ءوز قاجەتتىلىكتەرى ءۇشىن 2021-2023 جىلدارى ءبىرجولعى زەينەتاقى جيناقتارىن العاندارعا قاتىستى ەكەنىن ەسكە سالا كەتەلىك.
