2025 jylǵy 1 maýsymda qazaqstandyqtardyń zeinetaqy jinaqtary 22,9 trln teńgeni qurady. Onyń ishinde 4,6 trln teńgeden astamy syrttai basqarýǵa jatady. Biylǵy jyldyń bes aidaǵy kiristilik deńgeii ortasha, al taza investitsiialyq tabys 152 mlrd teńgeni qurap, sarapshylar qaýymy tarapynan qatty synǵa ushyrady, dep habarlaidy Dalanews.kz.
Biraq ekonomist Rýslan Sultanovtyń bul rette aitar óz ýáji bar.
"Fakti boiynsha sóileseiikshi. BJZQ degen qandai da bir venchýrlyq qor emes, ol tabiǵatynan konservativti bolyp keledi. BJZQ-nyń negizgi mindeti – aqshany barynsha kóbeitý emes, ony saqtaý. Sondyqtan da mundaǵy aktivterdiń qurylymy boljamdy túrde konservativti bolyp keledi", - deidi ol.
BJZQ aktivteriniń qurylymy demekshi, ondaǵy úles mynandai:
- 44% - QR memlekettik qaǵazdary
- 15% - shet memleketterdiń egemendi obligatsiialary
- 14% - qazaqstandyq kompaniialardyń qaǵazdary
- 20% - syrtqy senimgerlik basqarýda.
"Kóbirek kiristi qalaisyzdar ma? Ondai quraldar bar, máselen maýsym aiyndaǵy jaǵdai boiynsha: erikti zeinetaqy segmentindegi jeke basqarýshy kompaniialar ainalymynda 62,3 mlrd teńge júr. Bul, ázirge jappai sipatqa ie jait emes. Biraq, bul -tjinaqtardy jekelendirýdiń joly, iaǵni bul arada strategiiany tańdaýǵa, kiristi baǵalaýǵa, menedjerdi ózgertýge bolady", - deidi ekonomist.
Onyń aitýynsha, Qazaqstandaǵy jinaqtaý júiesi turaqty jáne aýqymdy sipatqa ie.
"Zeinetaqy aktivteri uzaq merzimdi investitsiialar ekenin este ustaǵan jón, sondyqtan olardyń basqarý tiimdiligin tek jyldyq jáne odan da kóp kezeńder esebine súiene otyryp, baǵalaýǵa bolady. Biraq eń bastysy, ol arada tańdaý, aqsha jáne infraqurylym bar. Bul arada másele jumys istemei jatqandyǵynda emes, kóptegen adamdar ruqsat etilgen óz quqyǵynyń paidalanbaýynda", - deidi Rýslan Sultanov.
Buǵan deiin BJZQ keibir el azamattaryna kezinde tólegen jeke tabys salyǵyn qaitara bastaitynyn jazǵanbyz. Bul shara qordan óz qajettilikteri úshin 2021-2023 jyldary birjolǵy zeinetaqy jinaqtaryn alǵandarǵa qatysty ekenin eske sala ketelik.
