– ءقازىر زامان باسقا. تالاپتار دا جوعارى. ەكونوميكالىق داعدارىس، ساياسي جاعدايدار بار، سوندىقتان حالىق بيلىكتەن كوپ زات كۇتەدى. حالىقتىڭ جاعدايىن جاقسارتۋ كەرەك. ول ءۇشىن بيلىك جۇمىس جاساۋ كەرەك. ەگەر جۇمىس جاساي الماسا، ورىندارىن بوساتۋلارى كەرەك، – دەدى وبلىس باسشىسى،
ساپاربايەۆتىڭ پايىمىنشا، بيلىكتە جەرشىلدىك، رۋشىلدىق دەگەن بولماۋ كەرەك.
– بىزدە ءبىر-اق رۋ، ءبىر-اق جەر بار. ول – قازاقستاننىڭ جەرى. رۋشىلدىعىمىز – قازاقستاننىڭ ازاماتى. قازاقستاننىڭ كونستيتۋسياسىنا سايكەس، قازاقستاننىڭ ازاماتى قازاقستاننىڭ تۇكپىر-تۇكپىرىنە بارىپ جۇمىس ىستەۋگە قاقىسى بار. ال،وڭىردەگى كادرلىق وزگەرىستەرگە كەلەر بولساق، مەن ولارعا توعىز اي ۋاقىت بەردىم. جۇمىس ىستەي الماساڭدار، ورىندارىڭدى بوساتاسىڭدار دەگەم. ءۇش اكىم، ونىڭ ىشىندە قالا باسشىسى بار، ورىندارىنان كەتتى. كەيبىرەۋلەر «باياعى جارتاس – ءبىر جارتاس»، اكىمدەردى الىپ تاستاۋ كەرەك ەدى دەپ جازادى. ءقازىر مەملەكەتتىك قىزمەت تۋرالى زاڭنامادا اكىم بولۋ ءۇشىن ا كورپۋسىندا بولۋ كەرەك. وكىنىشكە قاراي، جاقسى جىگىتتەر بار، ءبىراق ا كورپۋسىندا جوق، – دەيدى وبلىس اكىمى.
بەردىبەك ساپاربايەۆ شالقار مەن تەمىر اۋداندارىنىڭ بۇرىنعى اكىمدەرىندە كەمشىلىكتەر بارىن، ءبىراق تاعى ءبىر مۇمكىندىك بەرىپ جاتقانىن جەتكىزدى.
– مەنىڭ تاجىريبەمدە بىلاي: ەشۋاقىتتا جۇمىستان بوساعان كىسىنى جۇمىسسىز قالدىرمايمىن. اكىم بولا المايسىڭ، مىنا جۇمىستى جاسا، باسقارما باسشىسى بولا المايدى ەكەنسىڭ، باسقا جۇمىستى كور دەيمىن. ەگەر ماعان رەنجۋلى ادامدار ماعان قارسى جۇمىس جاسايمىز دەسە، ونى اقتوبەدە تۇرىپ جاتقان حالىققا قارسى جاسالىپ جاتقان جۇمىس دەپ ءتۇسىنۋ كەرەك. ءبىراق ماعان قارسى بىردەڭە ۇيىمداستىرا قويادى دەپ ويلامايمىن، – دەيدى وبلىس اكىمى.
مارات تولەپبەرگەن،
«ءتىلشى» سايتى
