جامبىل وبلىسىنىڭ اكىمى بەردىبەك ساپاربايەۆ كارانتين رەجيمىن ءتيىستى دارەجەدە قامتاماسىز ەتپەگەنى ءۇشىن تاراز قالاسى مەن بايزاق جانە تالاس اۋداندارىنىڭ اكىمدەرىنە سوگىس جاريالادى دەپ حابارلادى وبلىس اكىمدىگىنىڭ باسپا ءسوز قىزمەتى.

جامبىل وبلىسى بويىنشا جەدەل شتابتىڭ كەزەكتى وتىرىسىندا كوروناۆيرۋس ينفەكسياسى بويىنشا ەپيدەميولوگيالىق احۋال بارىسى تالقىلاندى. ستاتيستيكاعا سايكەس، ايماقتا COVID-19 اۋرۋىنىڭ ءوسۋى بايقالۋدا.

– وكىنىشكە قاراي، وبلىسىمىزدا كوروناۆيرۋستىق ينفەكسيانىڭ تارالۋى جالعاسۋدا. سوڭعى 10 كۇننىڭ ىشىندە 30 جاڭا جاعداي انىقتالدى.

بۇل جەرگىلىكتى الدىن-الۋ جۇمىستارىنىڭ السىزدىگىن جانە كارانتيندىك شارالاردىڭ ءتيىستى دەڭگەيدە ساقتالماي وتىرعاندىعىن كورسەتەدى.  ەكونوميكالىق قاجەتتىلىككە بايلانىستى شاعىن جانە ورتا بيزنەستىڭ كەيبىر سالالارىنىڭ قىزمەتىنە شەكتەۋلەر الىنىپ تاستالدى. دەگەنمەن، بۇل قاۋىپسىزدىك شارالارىن ەلەمەۋگە بولادى دەگەندى بىلدىرمەيدى.

كارانتيندىك رەجيمنىڭ تالاپتارى ساقتالۋى كەرەك جانە وعان بارلىعى مىندەتتى. الايدا، تاراز قالاسى مەن اۋدان ورتالىقتارىندا كوپتەگەن تۇرعىندار قورعانىش مەديسينالىق ماسكالارىن پايدالانباۋدا، ال ساۋدا ورىندارى مەن باسقا دا نىسانداردا ازاماتتاردىڭ قاۋىپسىزدىگىن قامتاماسىز ەتۋ بويىنشا ءتيىستى تالاپتار ورىندالماي وتىر.

ايتالىق، تالاس جانە بايزاق اۋداندارىندا ءبىر جەردە ادامداردىڭ كوپ جينالۋىنا قاتىس جاعدايدىڭ سالدارىنان اۋرۋشاڭدىقتىڭ ءوسۋى ورىن العان، – دەدى وبلىس اكىمى بەردىبەك ساپاربايەۆ.

جامبىل وبلىستىق تاۋارلار مەن قىزمەتتەردىڭ ساپاسىن جانە قاۋىپسىزدىگىن باقىلاۋ دەپارتامەنتىنىڭ باسشىسى بەرىك جارقىنبەكوۆتىڭ ايتۋىنشا، بيىل 24 ناۋرىزدان 21 مامىرعا دەيىن ايماقتا كوروناۆيرۋستىق ينفەكسيانىڭ 229 جاعدايى تىركەلگەن. ونىڭ باسىم بولىگى تاراز قالاسى مەن قورداي جانە بايزاق اۋداندارىندا.

بۇعان دەيىن اۋرۋدىڭ وڭىرىمىزگە سىرتتان اكەلۋ جاعدايلارى كوبىرەك بايقالسا، سوڭعى كەزدەرى جەرگىلىكتى تۇرعىندار اراسىندا جۇقتىرۋ دەرەگى ءوسىپ وتىر. مۇنداي وقيعالاردىڭ جوعارى ۇلەس سالماعى وبلىس ورتالىعىندا جانە بايزاق اۋدانىندا انىقتالعان. 21 مامىر كۇنگى جاعدايعا سايكەس، وبلىس بويىنشا اۋرۋشاڭدىقتىڭ ءوسۋ دەڭگەيى تاۋلىگىنە 5،4 پايىزدى، ال سوڭعى 7 كۇندە – 17،4 پايىزدى قۇراعان.

وسىلايشا، ءوز جۇمىسىندا جىبەرىپ العان كەمشىلىكتەرى ءۇشىن تاراز قالاسىنىڭ، تالاس جانە بايزاق اۋداندارىنىڭ اكىمدەرىنە سوگىس جاريالاندى. ال، وسى باعىتقا جەتەكشىلىك ەتەتىن تاراز قالاسى اكىمىنىڭ ورىنباسارى قىزمەتىنەن بوساتىلدى. بۇدان بولەك، قورداي، بايزاق جانە تالاس اۋداندارى اكىمدەرىنىڭ ورىنباسارلارىنىڭ جەكە جاۋاپكەرشىلىگى قارالادى.

بەردىبەك ساپاربايەۆ جەرگىلىكتى اتقارۋشى ورگانداردىڭ باسشىلارىن الەۋمەتتىك قامسىزداندىرۋ جانە تۇرعىنداردى جۇمىسپەن قامتۋ جايىنا باسا نازار اۋدارۋعا شاقىردى.