Jambyl oblysy boiynsha jedel shtabtyń kezekti otyrysynda koronavirýs infektsiiasy boiynsha epidemiologiialyq ahýal barysy talqylandy. Statistikaǵa sáikes, aimaqta COVID-19 aýrýynyń ósýi baiqalýda.
– Ókinishke qarai, oblysymyzda koronavirýstyq infektsiianyń taralýy jalǵasýda. Sońǵy 10 kúnniń ishinde 30 jańa jaǵdai anyqtaldy.
Bul jergilikti aldyn-alý jumystarynyń álsizdigin jáne karantindik sharalardyń tiisti deńgeide saqtalmai otyrǵandyǵyn kórsetedi. Ekonomikalyq qajettilikke bailanysty shaǵyn jáne orta biznestiń keibir salalarynyń qyzmetine shekteýler alynyp tastaldy. Degenmen, bul qaýipsizdik sharalaryn elemeýge bolady degendi bildirmeidi.
Karantindik rejimniń talaptary saqtalýy kerek jáne oǵan barlyǵy mindetti. Alaida, Taraz qalasy men aýdan ortalyqtarynda kóptegen turǵyndar qorǵanysh meditsinalyq maskalaryn paidalanbaýda, al saýda oryndary men basqa da nysandarda azamattardyń qaýipsizdigin qamtamasyz etý boiynsha tiisti talaptar oryndalmai otyr.
Aitalyq, Talas jáne Baizaq aýdandarynda bir jerde adamdardyń kóp jinalýyna qatys jaǵdaidyń saldarynan aýrýshańdyqtyń ósýi oryn alǵan, – dedi oblys ákimi Berdibek Saparbaev.
Jambyl oblystyq taýarlar men qyzmetterdiń sapasyn jáne qaýipsizdigin baqylaý departamentiniń basshysy Berik Jarqynbekovtiń aitýynsha, biyl 24 naýryzdan 21 mamyrǵa deiin aimaqta koronavirýstyq infektsiianyń 229 jaǵdaiy tirkelgen. Onyń basym bóligi Taraz qalasy men Qordai jáne Baizaq aýdandarynda.
Buǵan deiin aýrýdyń óńirimizge syrttan ákelý jaǵdailary kóbirek baiqalsa, sońǵy kezderi jergilikti turǵyndar arasynda juqtyrý deregi ósip otyr. Mundai oqiǵalardyń joǵary úles salmaǵy oblys ortalyǵynda jáne Baizaq aýdanynda anyqtalǵan. 21 mamyr kúngi jaǵdaiǵa sáikes, oblys boiynsha aýrýshańdyqtyń ósý deńgeii táýligine 5,4 paiyzdy, al sońǵy 7 kúnde – 17,4 paiyzdy quraǵan.
Osylaisha, óz jumysynda jiberip alǵan kemshilikteri úshin Taraz qalasynyń, Talas jáne Baizaq aýdandarynyń ákimderine sógis jariialandy. Al, osy baǵytqa jetekshilik etetin Taraz qalasy ákiminiń orynbasary qyzmetinen bosatyldy. Budan bólek, Qordai, Baizaq jáne Talas aýdandary ákimderiniń orynbasarlarynyń jeke jaýapkershiligi qaralady.
Berdibek Saparbaev jergilikti atqarýshy organdardyń basshylaryn áleýmettik qamsyzdandyrý jáne turǵyndardy jumyspen qamtý jaiyna basa nazar aýdarýǵa shaqyrdy.
