"بىرىنشىدەن، دوسىم وسىنداي جازبانى جازۋى ءۇشىن بىزبەن كەزدەسىپ الۋى كەرەك. سول كەزدە ءبىزدىڭ قالاي سايلاۋعا قاتىسىپ جاتقانىمىزدى ءبىلىپ، كوپ سۇراعىنىڭ جاۋابىن ءبىزدىڭ اۋزىمىزدان ەستيتىن ەدى. ايتپەسە، ونىڭ جازباسى تەك قارالاۋ نەگىزىندە عانا جازىلىپ تۇر. ءبىزدىڭ "ۇلى دالا قىراندارى" — رەسپۋبليكالىق قوعامدىق بىرلەستىك. ءبىزدىڭ ارتىمىزدا ەشقانداي كلاندار نەمەسە قارجىلىق توپتار جوق. ال مەن ەشبىر پارتيانىڭ مۇشەسى ەمەسپىن. كەزەكتەن تىس پرەزيدەنتتىك سايلاۋ تۋرالى زاڭ شىققاننان باستاپ سايلاۋعا ءتۇسۋ تۋرالى شەشىم قابىلدادىق. سەبەبى مەملەكەت بىزگە مۇمكىندىك بەردى. سايلاۋعا پارتيالارمەن قاتار قوعامدىق بىرلەستىكتەر دە قاتىسا الاتىندىقتان، ءبىز اقىلداسا كەلە وسىنداي شەشىمگە كەلدىك.
قاتىسۋشىلار مەن دەلەگاتتار مەنى كانديدات رەتىندە ۇسىنىپ، سايلاۋ دوداسىنا قاتىستىق. سودان بەرى سايلاۋ دوداسىنىڭ ناق ورتاسىندا اللانىڭ قالاۋىمەن، حالىقتىڭ قولداۋىمەن كەلە جاتىرمىز. بۇل نەنى كورسەتەدى؟
بۇل قازىردە ءبىزدىڭ ەلىمىزدە، قوعامىمىزدا دەموكراتياعا دەگەن بەتبۇرىستىڭ بارىن كورسەتەدى. ەلدە، حالىقتا تاڭداۋ بار"، - دەدى سادىبەك تۇگەل.
كەيىن سادىبەك تۇگەل قازاق ءتىلىنىڭ مۇشكىل جاعدايى تۋرالى ءسوز قوزعادى.
"ەكىنشىدەن، قازىرگى تاڭداعى نەگىزگى ماسەلەلەردى ءبىرى ءارى ماڭىزدىسى – ءتىل ماسەلەسى. 30 جىل وتسە دە، ءتىل ءوزىنىڭ تۇعىرىنا جەتپەك تۇگىلى، كۇننەن-كۇنگە تومەندەپ بارا جاتىر. ءوز ەلىندە، ءوز جەرىندە ءۇشىنشى سورتتاعى تىلگە اينالىپ وتىر. بۇل دۇرىس ەمەس. قازىرگى ءتىلدىڭ جاعدايى وزەك ورتەر ۇتىلىستا بولىپ تۇر. سول سەبەپتى مەن ءوزىمنىڭ سايلاۋالدى باعدارلامامدى ءوز انا تىلىمدە، مەملەكەتىمنىڭ تىلىندە جۇرگىزەمىن. ماقساتىم– مەملەكەتتىك ءتىلدىڭ مارتەبەسىن كوتەرۋ.
اينالايىن، دوسىم ارادا 30 جىل ءوتتى. ءوزىڭ نەگە مەملەكەتتىك ءتىلدى قۇرمەتتەمەيسىڭ؟ نە سەبەپتى مەملەكەتتىك تىلدە سويلەپ، مەملەكەتتىك تىلدە جازىپ، وسىنداي ماسەلەلەردى كوتەرمەيسىڭ؟
ساياساتتانۋشى دەگەن حالىقتىڭ مۇڭ-مۇقتاجىن ايتادى. وسىنداي ماڭىزدى ماسەلەلەردى ايتقان كەزدە ەڭ الدىمەن ءوزىڭنىڭ مەملەكەتتىك تىلىڭدە سويلەۋىڭ كەرەك. مەملەكەتتىك تىلدە ايتىپ، جازۋىڭ كەرەك. سوندا بۇل ءادىل بولادى" ، -دەدى سادىبەك تۇگەل.
سونىمەن قاتار ول ساياساتتانۋشىنى كەزدەسىپ، اقىلداسۋعا شاقىردى. قوعامدىق بىرلەستىكتىڭ ءتىل ماسەلەسىن قوزعاپ، دارىپتەپ جۇرگەنىنە 20 جىلدان اسقان. ال رەسمي تىركەلگەنىنە 8 جىل بولىپتى. قوعامدىق بىرلەستىكتىڭ نەگىزگى ماقساتى — اتادان بالاعا ميراس بولعان ۇلتتىق قۇندىلىقتاردى ۇلىقتاۋ، ۇلى دالا مادەنيەتىن جاڭعىرتىپ، جاستاردىڭ يگىلىگىنە جاراتۋ.
"ساياساتتانۋشى رەتىندە ايتشى، قازىرگى اقپاراتتىڭ 85 پايىزى ورىس تىلىندە. ورىس ءتىلى بۇعان مۇقتاج ەمەس. ول – الەمدىك التى ءتىلدىڭ ءبىرى.
ال ءبىزدىڭ ءتىل كۇننەن كۇنگە قۇرىپ بارا جاتىر. سونىڭ باسى قاسىندا ءسىز سەكىلدى ساياساتتانۋشىلار تۇرۋى كەرەك ەدى. وسىعان جاۋاپ بەرشى. نەگە ءبىز وسىنداي كۇيگە تۇستىك؟ سول سەبەپتى ءسىزدىڭ سايلاۋعا بايلانىستى قارالاپ جازعان جازباڭىزدى دۇرىس ەمەس دەپ ەسەپتەيمىن. بىرىنشىدەن، جازباڭىز شىندىققا، اقيقاتقا ساي ەمەس. ال ءبىزدىڭ پوزيسيامىز – دۇرىستى دۇرىس، بۇرىستى بۇرىس دەۋ. سايلاۋ بولعاننان كەيىن كەمشىلىك بولۋى ابدەن مۇمكىن. ءبىراق ول ۋاقىتشا عانا. ەڭ باستىسى، ءبىزدىڭ ۇستانىمىمىزدى قازاق حالقى قولداپ وتىر"، - دەپ ءسوزىن تۇيىندەدى كانديدات.
دەرەككوز: قامشى پورتالى
https://youtu.be/dif982u9B0I
