«رۋسكيي مير» دەگەن دۇنيەنى جەلەۋ ەتىپ، 2014 جىلى ۋكراينادان قىرىم مەن دونباس پەن لۋگانسكىنى تارتىپ الدى. ونداعى ايرانداي ۇيىپ وتىرعان ورىستاردى «رۋسكيي ءميردىڭ» جاقتاۋشىسىنا اينالدىرىپ، قولتىعىنا سۋ بۇرىكتى.
ال بيىل جىل باسىندا پۋتين «رۋسكيي ءميرىن» قۇرۋ ماقساتىندا ۋكرايانا جەرىنە باسا-كوكتەپ كىردى. ءقازىر سول باسقىنشىلىق ساياساتى ءپۋتيننىڭ باسىنا تاياق بولىپ ءتيىپ جاتىر. ءبىراق اقىلعا كەلەتىن پۋتين جوق.
بۇگىندە «رۋسكيي مير» دەپ وڭەشىن جىرتىپ ايعايلاعان كەيبىر ورىستار «رۋسكيي ءميردىڭ» قايدا قالعانىن بىلمەي دال بولۋدا.
وتكەندە ءلنر-دىڭ ورىستارى «دونباس ءۇشىن سوعىسىپ، وققا ۇشاتىن جايىمىز جوق» دەپ ۋكاراين ساربازدارىنان جەڭىلىپ جاتقان ءدنر-دىڭ ورىستارى ءۇشىن قىلشىعى قيسايمايتىنىن اشىپ ايتتى.
بۇگىن ۋكرايندىق اسكەري ساراپشى ولەگ جدانوۆ رەسەيدىڭ پاسپورتىنا يە بولعان لنر مەن ءدنر-دىڭ ورىستارىن كرەمل ىشكى رەسەيگە اياق اتتاپ باستىرماي جاتقانىن العا تارتتى. وسىلايشا كرەمل دونباس پەن لۋگانسكىنىڭ ورىستارىن اياماي، قاندى قاساپقا سالۋدى ءجون كورىپ وتىرعانىن بايقاۋعا بولادى.
ىشكى رەسەيدەن كەلگەن ورىستار شايقاستا وق ءتيىپ جارالانسا، ولاردى ىشكەرى اكەتىپ، ەم-دوامىن جاسايدى ەكەن. ال «رۋسكيي ءميردىڭ» اشىق جاقتاۋشىسى سانالىپ كەلگەن دونباس پەن لۋگانسكىدەن شىققان ورىستاردى شەكارانىڭ بەرگى بەتىندە ەم قابلداپ، سوعىسقا قايتا سالۋدا.
– جاراقات العاندارعا بۇلايشا الالاپ قاراۋ «رۋسكيي ميرگە» سىنا قاعاتىنىنى ايتاپاسا دا تۇسىنىكتى. بۇگىندە رەسەيدىڭ پاسپورتىن ءبىرىنشى بولىپ العان دونباس پەن لۋگانسكىنىڭ تۇرعىندارى ىشكى رەسەيدە جىلجىمايتىن مۇلكى بولسا عانا رەسەيگە بارۋىنا رۇقسات بەرىلەتىنىن ۇزىنقۇلاقتان ەستىدىك. ولار قۇر پاسپورتىن كورسەتىپ، شەكارادان وتە المايدى. وسىلايشا كرەمل دونباس پەن لۋگانسكىدەگى «رۋسكيي ءميردىڭ» جاقتاۋشىلارىنا تەرىس اينالا باستادى، – دەيدى ولەگ جدانوۆ.
وسىلايشا كرەملدىڭ ءوزى «رۋسكيي ءميردى» بولشەكتەۋگە كوشكەن سىڭايىلى.
