«16 شىلدەگە جوسپارلانعان «الماتى – مالە» رەيسىنىڭ ۇزاق كەشىگۋىنە بايلانىستى جەدەل تۇردە ەكى كۇن ىشىندە تەرگەۋ جۇرگىزىلدى. ونىڭ قورىتىندىسى بويىنشا وسى رەيستىڭ جولاۋشىلارى ۇشۋدى 15 ساعاتتان ارتىق كۇتكەندىگى انىقتالدى. رەيستى كۇتۋ كەزىندە جولاۋشىلارعا «قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياسيا قىزمەتى تۋرالى» ق ر زاڭىنىڭ 86-بابىنىڭ 1-بولىگىندە كوزدەلگەن قىزمەتتەر، اتاپ ايتقاندا قوناق ۇيدە تۇرۋ بويىنشا قىزمەتتەر ءتيىستى تۇردە ۇسىنىلماعان» دەپ جازىلعان كوميتەت حابارلاماسىندا.
اۋە كومپانياسىنا 1000 ايلىق ەسەپتىك كورسەتكىش ياعني، شامامەن 3 ملن تەڭگە (6200 دوللار) ايىپپۇل سالىنعان.
وسى ۋاقىتقا دەيىن كوميتەتكە بارلىعى 150-گە جۋىق ءوتىنىش كەلىپ تۇسكەن. «ولاردىڭ ءارقايسىسى بويىنشا انىقتاۋ جۇمىستارى جۇرگىزىلىپ جاتىر. ونىڭ ناتيجەسى بويىنشا قولدانىستاعى زاڭنامادا كوزدەلگەن ءتيىستى ءىس شارالار قابىلداناتىن بولادى» دەپ جازىلعان حابارلامادا.
وسىعان دەيىن قازاقستاننىڭ ازاماتتىق اۆياسيا كوميتەتى Air Astana جانە وعان ەنشىلەس FlyArystan اۋە كومپانياسى رەيستەرىنىڭ «كوپ كەشىككەنى» جايلى فاكتىلەردى تەكسەرەتىنىن حابارلاعان.
كوميتەتتىڭ ايتۋىنشا، Air Astana جانە وعان ەنشىلەس FlyArystan اۋە كومپانياسىنىڭ «الماتى — مالە»، «نۇر-سۇلتان — تاشكەنت» جانە «الماتى — قوستاناي» جانە وزگە باعىتتار بويىنشا رەيستەرىنىڭ كەشىككەنى جايلى جولاۋشىلاردان ارىز-شاعىمدار كەلىپ تۇسكەن.
وتكەن اپتادا Air Astana اۋە كومپانياسى مالديۆ ارالدارىنا ۇشاتىن رەيسىنىڭ كەشىگۋىن ۇشۋ كەزىندە انىقتالعان اقاۋمەن بايلانىستىرعان.
