25 قازان – رەسپۋبليكا كۇنى مەرەكەسى قارساڭىندا تۇركىستان قالاسىندا 260 پاتەرلى، 3 كوپقاباتتى تۇرعىن ءۇي ەل يگىلىگىنە پايدالانۋعا تاپسىرىلدى. تۇرعىنداردىڭ قۋانىشىن بولىسۋگە وبلىس اكىمى دارحان ساتىبالدى ارنايى بارىپ، ازاماتتارعا باسپانا كىلتىن تابىس ەتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

– سىزدەردى رەسپۋبليكا كۇنىمەن قۇتتىقتايمىن! ەگەمەن ەلىمىز ماڭگى جاساسىن! وسىنداي ايتۋلى مەرەكە قارساڭىندا وبلىس ورتالىعىنىڭ تۇرعىندارى قۋانىشقا بولەنىپ وتىر. ءبىز حالىقتى باسپانامەن قامتۋ باعىتىنداعى جۇمىستاردى توقتاتپايمىز. بىزدەن ءبىر عانا تالاپ – اينالانى تازا ۇستاپ، تازالىقتى ساقتاۋ، – دەدى دارحان ساتىبالدى.

تۇركىستان قالاسىنىڭ «وتىرار» سەكتورى اۋماعىندا 20 تۇرعىن ءۇيدىڭ قۇرىلىسى باستالدى. ونىڭ ىشىندە 9 تۇرعىن ءۇيدى «باستاۋ» كورپوراسياسى ارقىلى ساتىپ الۋ جۇمىستارى جۇرگىزىلىپ، كەزەكتە تۇرعان ازاماتتارعا ۇلەستىرىلۋدە.

بۇگىن 3 تۇرعىن ءۇي 123 كوپبالالى وتباسىنا، 129 حالىقتىڭ «الەۋمەتتىك جاعىنان ءالسىز توپتارى» ساناتىنا ەنەتىن ازاماتتارعا جانە 8 جەتىم جانە اتا-اناسىنىڭ قامقورلىعىنسىز قالعان بالاعا بەرىلدى.

قازىرگى تاڭدا تۇركىستان قالاسىنىڭ تۇرعىن ءۇي كەزەگىندە باسپاناعا مۇقتاج 16 515 ازامات تۇر. جەرگىلىكتى تۇرعىنداردى باسپانامەن قامتۋ جۇمىستارى قارقىندى ءجۇرىپ جاتىر. بيىل وبلىس ورتالىعىندا كەزەكتە تۇرعان 222 وتباسى ارەندالىق باسپانامەن قامتاماسىز ەتىلدى.

سونىمەن قاتار جىل سوڭىنا دەيىن كەزەكتەگى ازاماتتاردى تۇرعىن ۇيمەن قامتاماسىز ەتۋ ماقساتىندا 1728 پاتەرلى 20 كوپقاباتتى تۇرعىن ءۇيدىڭ قۇرىلىسى جۇرگىزىلۋدە.