سالتاناتتى تۇردە اتاپ وتىلگەن ءىس-شاراعا وبلىس اكىمىنىڭ ورىنباسارى اسەت قاناعاتوۆ پەن قالا اكىمى ەرنات ءبازىل قاتىسىپ، جۇرتشىلىقتى قۋانىشتارىمەن قۇتتىقتادى.
ءا. قاناعاتوۆ تۇرعىنداردى وبلىس كولەمىندە اتقارىلىپ جاتقان گازداندىرۋ شارالارى جايلى حاباردار ەتتى.
ءوز كەزەگىندە قالا اكىمى جاڭا شاعىن اۋداننىڭ ينفراقۇرىلىمىن دامىتۋ جۇمىستارىنا كەڭىنەن توقتالدى.
- «جاستار -2» شاعىن اۋدانىندا 22 شاقىرىمعا گاز قۇبىرى تارتىلىپ، وعان 295 ملن. تەڭگەدەن استام قارجى ءبولىندى. 2022 جىلى قۇرىلىس جۇمىستارىن باستاعان «رەم ستروي» ج ش س بۇگىندە جوبانى تولىق اياقتادى. ءسويتىپ 526 ابونەنتتىڭ گازعا قوسىلۋىنا مۇمكىندىك جاسالىپ وتىر. 2025 جىلعا دەيىن قالانىڭ بارلىق ايماعىنا گاز تارتۋ جوسپارلانعان. جالپى «جاستار-2» تۇرعىن ءۇي الابىنىڭ ينفراقۇرىلىمىن جاقسارتۋعا باعىتتالعان جۇمىستار كەزەڭ-كەزەڭىمەن اتقارىلىپ كەلەدى. اتاپ ايتقاندا، مۇندا 21 شاقىرىمعا اۋىز سۋ قۇبىرى تارتىلىپ، بۇگىندە تۇرعىندار 100% اۋىز سۋمەن قامتىلىپ وتىر، - دەدى ە.ءبازىل.
ونىڭ ايتۋىنشا، تۇرعىن ءۇي الابىن اباتتاندىرۋ ماقساتىندا 16 كوشەدە زاماناۋي ۇلگىدەگى 514 جارىق باعانى ورناتىلعان. بۇدان بولەك، جولدىڭ ساپاسىن جاقسارتۋ ءۇشىن 13 كوشەنىڭ 11،2 شاقىرىمىنا جوبالىق-سمەتالىق قۇجاتتاما ازىرلەنۋدە. سول سياقتى مەملەكەت باسشىسى قاسىم-جومار توقايەۆتىڭ باستاماسىمەن قولعا الىنىپ جاتقان «جايلى مەكتەپ» جوباسى اياسىندا تۇرعىن ءۇي الابىندا 900 ورىندى مەتەپ قۇرىلىسىن جۇرگىزۋ ءۇشىن جوبالىق-سمەتالىق قۇجاتتاماسى ازىرلەنىپ، كەلەر جىلى قۇرىلىس جۇمىستارى باستالاتىن بولادى.
سونىمەن بىرگە جىل سوڭىنا دەيىن «ىنتىماق» جەكە تۇرعىن الابىنىڭ 9500-گە جۋىق تۇرعىنى جانە تالدىقورعان قالاسىنىڭ ىشىندە قالعان ۋچاسكەلەردەگى 585 تۇرعىن گازعا قول جەتكىزسە، كەلەسى جىلى مويناق اۋىلىنا گاز قۇبىرى تارتىلىپ ءبىتۋى ءتيىس.
ەرتەڭ قاراتال اۋدانىندا كالپە جانە ويان اۋىلدارىنا گاز بەرىلىپ، ولارداعى 700 ءۇي كوگىلدىر وتىننىڭ يگىلىگىن كورەتىن بولادى.
2025 جىلعا دەيىن كەربۇلاق اۋدانىنان تالدىقورعانعا دەيىنگى ەلدى مەكەندەر تولىق گازداندىرىلۋى ءتيىس. ال 2030 جىلعا قاراي ءوڭىردى گازداندىرۋ 100%-عا جەتەدى نەمەسە 192 ەلدى مەكەندى قامتىلادى دەپ مەجەلەنىپ وتىر.
