Saltanatty túrde atap ótilgen is-sharaǵa oblys ákiminiń orynbasary Áset Qanaǵatov pen qala ákimi Ernat Bázil qatysyp, jurtshylyqty qýanyshtarymen quttyqtady.
Á. Qanaǵatov turǵyndardy oblys kóleminde atqarylyp jatqan gazdandyrý sharalary jaily habardar etti.
Óz kezeginde qala ákimi jańa shaǵyn aýdannyń infraqurylymyn damytý jumystaryna keńinen toqtaldy.
- «Jastar -2» shaǵyn aýdanynda 22 shaqyrymǵa gaz qubyry tartylyp, oǵan 295 mln. teńgeden astam qarjy bólindi. 2022 jyly qurylys jumystaryn bastaǵan «Rem stroi» JShS búginde jobany tolyq aiaqtady. Sóitip 526 abonenttiń gazǵa qosylýyna múmkindik jasalyp otyr. 2025 jylǵa deiin qalanyń barlyq aimaǵyna gaz tartý josparlanǵan. Jalpy «Jastar-2» turǵyn úi alabynyń infraqurylymyn jaqsartýǵa baǵyttalǵan jumystar kezeń-kezeńimen atqarylyp keledi. Atap aitqanda, munda 21 shaqyrymǵa aýyz sý qubyry tartylyp, búginde turǵyndar 100% aýyz sýmen qamtylyp otyr, - dedi E.Bázil.
Onyń aitýynsha, turǵyn úi alabyn abattandyrý maqsatynda 16 kóshede zamanaýi úlgidegi 514 jaryq baǵany ornatylǵan. Budan bólek, joldyń sapasyn jaqsartý úshin 13 kósheniń 11,2 shaqyrymyna jobalyq-smetalyq qujattama ázirlenýde. Sol siiaqty Memleket basshysy Qasym-Jomar Toqaevtyń bastamasymen qolǵa alynyp jatqan «Jaily mektep» jobasy aiasynda turǵyn úi alabynda 900 oryndy metep qurylysyn júrgizý úshin jobalyq-smetalyq qujattamasy ázirlenip, keler jyly qurylys jumystary bastalatyn bolady.
Sonymen birge jyl sońyna deiin «Yntymaq» jeke turǵyn alabynyń 9500-ge jýyq turǵyny jáne Taldyqorǵan qalasynyń ishinde qalǵan ýchaskelerdegi 585 turǵyn gazǵa qol jetkizse, kelesi jyly Moinaq aýylyna gaz qubyry tartylyp bitýi tiis.
Erteń Qaratal aýdanynda Kálpe jáne Oian aýyldaryna gaz berilip, olardaǵy 700 úi kógildir otynnyń igiligin kóretin bolady.
2025 jylǵa deiin Kerbulaq aýdanynan Taldyqorǵanǵa deiingi eldi mekender tolyq gazdandyrylýy tiis. Al 2030 jylǵa qarai óńirdi gazdandyrý 100%-ǵa jetedi nemese 192 eldi mekendi qamtylady dep mejelenip otyr.
