30 ماۋسىمنان باستاپ قازاقستاندىقتار رەسەيگە تەك ساۋساق ىزدەرىن تاپسىرىپ، فوتوتۇسىرىلىمنەن وتكەن سوڭ عانا كىرە الادى. وسىعان بايلانىستى ق ر سىرتقى ىستەر مينيسترلىگى تۇسىنىكتەمە بەردى، دەپ حابارلايدى Dalanews.kz.
"ءبىز دە قوسىمشا شارالاردى ەنگىزۋ ماسەلەسىن قاراستىرىپ جاتىرمىز. بۇل ماسەلە بويىنشا مەملەكەتتىك ورگاندارمەن كەڭەسۋ قاجەت"، – دەدى مينيسترلىكتىڭ رەسمي وكىلى ايبەك سمادياروۆ.
ايتا كەتەيىك، بۇعان دەيىن رەسەي قازاقستانمەن اراداعى ۆيزاسىز قاتىناستى كۇرت قيىنداتقانىن جازعان ەدىك.
ەندى جاڭا تارتىپكە سايكەس، 2025 جىلدىڭ 30 ماۋسىمىنان باستاپ، قازاقستاندىقتار رەسەي اۋماعىنا كىرۋ ءۇشىن الدىن الا تىركەلىپ، ارنايى QR-كود الۋى ءتيىس بولادى. بۇل وزگەرىس قازاقستاننان بولەك، ازەربايجان، ارمەنيا، قىرعىزستان، تاجىكستان، وزبەكستان سەكىلدى ۆيزاسىز رەجيم تۋرالى كەلىسىم جاساعان ەلدەردىڭ ازاماتتارىنا دا قاتىستى.
رەسەي ۇكىمەتى قابىلداعان قاۋلى بويىنشا، قازاقستاندىقتار ەندى رەسەيگە جوسپارلانعان ساپارىنان كەم دەگەندە 72 ساعات بۇرىن ارنايى قوسىمشا ارقىلى تىركەۋدەن ءوتىپ، ساپار ماقساتى مەن مەرزىمىن، جەكە دەرەكتەرىن، سونداي-اق فوتوسۋرەتتەرىن ۇسىنۋى قاجەت. توتەنشە جاعدايدا (جاقىن تۋىسىنىڭ اۋىر سىرقاتى نەمەسە قايتىس بولۋى) بۇل مەرزىم جولعا شىعارعا دەيىنگى ءتورت ساعات بۇرىن ۋاقىتقا دەيىن قىسقارتىلادى.
جاڭا تارتىپكە سايكەس، تىركەلۋ "مەملەكەتتىك قىزمەتتەر RuID" اتتى ءموبيلدى قوسىمشاسى ارقىلى جۇزەگە اسىرىلماق. دەگەنمەن رەسەيلىك اقپارات قۇرالدارىنىڭ دەرەگىنشە، اتالعان قوسىمشا ازىرگە دايىن ەمەس. ساراپشىلاردىڭ پايىمىنشا، بۇل قوسىمشانىڭ جۇمىسى تەك ماۋسىم ايىنىڭ سوڭىنا قاراي ىسكە قوسىلادى دەپ كۇتىلۋدە.
