30 maýsymnan bastap qazaqstandyqtar Reseige tek saýsaq izderin tapsyryp, fototúsirilimnen ótken soń ǵana kire alady. Osyǵan bailanysty QR Syrtqy ister ministrligi túsinikteme berdi, dep habarlaidy Dalanews.kz.
"Biz de qosymsha sharalardy engizý máselesin qarastyryp jatyrmyz. Bul másele boiynsha memlekettik organdarmen keńesý qajet", – dedi ministrliktiń resmi ókili Aibek Smadiiarov.
Aita keteiik, buǵan deiin Resei Qazaqstanmen aradaǵy vizasyz qatynasty kúrt qiyndatqanyn jazǵan edik.
Endi jańa tártipke sáikes, 2025 jyldyń 30 maýsymynan bastap, qazaqstandyqtar Resei aýmaǵyna kirý úshin aldyn ala tirkelip, arnaiy QR-kod alýy tiis bolady. Bul ózgeris Qazaqstannan bólek, Ázerbaijan, Armeniia, Qyrǵyzstan, Tájikstan, Ózbekstan sekildi vizasyz rejim týraly kelisim jasaǵan elderdiń azamattaryna da qatysty.
Resei úkimeti qabyldaǵan qaýly boiynsha, qazaqstandyqtar endi Reseige josparlanǵan saparynan kem degende 72 saǵat buryn arnaiy qosymsha arqyly tirkeýden ótip, sapar maqsaty men merzimin, jeke derekterin, sondai-aq fotosýretterin usynýy qajet. Tótenshe jaǵdaida (jaqyn týysynyń aýyr syrqaty nemese qaitys bolýy) bul merzim jolǵa shyǵarǵa deiingi tórt saǵat buryn ýaqytqa deiin qysqartylady.
Jańa tártipke sáikes, tirkelý "Memlekettik qyzmetter RuID" atty mobildi qosymshasy arqyly júzege asyrylmaq. Degenmen reseilik aqparat quraldarynyń dereginshe, atalǵan qosymsha ázirge daiyn emes. Sarapshylardyń paiymynsha, bul qosymshanyń jumysy tek maýsym aiynyń sońyna qarai iske qosylady dep kútilýde.
