الماتى وبلىسىندا 70 ميلليارد تەڭگەدەن استام سوماعا ءۇش جوبا جۇزەگە اسىرىلادى،- دەپ حابارلايدى Dalanews.kz "Lsm.kz"-كە سىلتەمە جاساپ.
جاڭا وبەكتىلەر الاتاۋ قالاسىندا پايدا بولادى. جاڭا كاسىپورىندار اگروونەركاسىپ كەشەنىندە جانە لوگيستيكا سالاسىندا اشىلادى.
قۇرىلىس-مونتاجداۋ جۇمىستارى ساتىسىندا ءسۇت سالاسىن دامىتۋ شەڭبەرىندە ىسكە اسىرىلىپ جاتقان 15،9 ملرد تەڭگەگە جوبا بار. اۋىل شارۋاشىلىعى نىسانىنىڭ اشىلۋى كەلەسى جىلعا جوسپارلانىپ وتىر. جوبا اياسىندا 100 جۇمىس ورنى اشىلادى.
قالادا 10 ميلليارد تەڭگەگە لوگيستيكالىق وبەكت سالىنىپ جاتىر. بۇل جوبا 2021 جىلى باستالعان جانە 2026 جىلى اياقتالادى دەپ كۇتىلىپ وتىر. جوبانىڭ جۇزەگە اسىرىلۋى ناتيجەسىندە 3 مىڭ جۇمىس ورنى پايدا بولادى. قازىرگى ۋاقىتتا تەمىرجول جولدارى، لوكوموتيۆ دەپوسى، كونتەينەر الاڭدارى، كەدەن قويمالارى جانە باسقا دا ينفراقۇرىلىم ەلەمەنتتەرى سالىنعان. سونىمەن قاتار، جۇك تاسىمالداۋدى، قابىلداۋدى جانە ساقتاۋدى قامتاماسىز ەتۋ ءۇشىن تەحنيكالىق جانە ينفراقۇرىلىمدىق جابدىقتار قاراستىرىلعان.
سونداي-اق، اكىمدىكتە الاتاۋدا 45 ملرد تەڭگەگە ا كلاسىنداعى لوگيستيكالىق كەشەن ىسكە قوسىلاتىنى ايتىلدى. جوبا ەكى كەزەڭمەن جۇزەگە اسىرىلادى، وعان رەسەي مەن قازاقستان كومپانيالارى قاتىسادى. ءبىرىنشى كەزەڭنىڭ اشىلۋى 2026 جىلدىڭ سوڭىنا جوسپارلانعان، ەكىنشى كەزەڭى 2028 جىلى ىسكە قوسىلادى. 2 مىڭ جۇمىس ورنى اشىلادى دەپ كۇتىلۋدە. قازىرگى ۋاقىتتا جوبا-سمەتالىق قۇجاتتاما ازىرلەنىپ جاتىر. سونداي-اق، سۋ، گاز، ەلەكتر ەنەرگياسىن، كاناليزاسيا مەن تەلەفون بايلانىسىن تارتۋ بويىنشا تەحنيكالىق شارتتار الىندى.
