Almaty oblysynda 70 milliard teńgeden astam somaǵa úsh joba júzege asyrylady,- dep habarlaidy Dalanews.kz "Lsm.kz"-ke silteme jasap.
Jańa obektiler Alataý qalasynda paida bolady. Jańa kásiporyndar agroónerkásip kesheninde jáne logistika salasynda ashylady.
Qurylys-montajdaý jumystary satysynda sút salasyn damytý sheńberinde iske asyrylyp jatqan 15,9 mlrd teńgege joba bar. Aýyl sharýashylyǵy nysanynyń ashylýy kelesi jylǵa josparlanyp otyr. Joba aiasynda 100 jumys orny ashylady.
Qalada 10 milliard teńgege logistikalyq obekt salynyp jatyr. Bul joba 2021 jyly bastalǵan jáne 2026 jyly aiaqtalady dep kútilip otyr. Jobanyń júzege asyrylýy nátijesinde 3 myń jumys orny paida bolady. Qazirgi ýaqytta temirjol joldary, lokomotiv deposy, konteiner alańdary, keden qoimalary jáne basqa da infraqurylym elementteri salynǵan. Sonymen qatar, júk tasymaldaýdy, qabyldaýdy jáne saqtaýdy qamtamasyz etý úshin tehnikalyq jáne infraqurylymdyq jabdyqtar qarastyrylǵan.
Sondai-aq, ákimdikte Alataýda 45 mlrd teńgege A klasyndaǵy logistikalyq keshen iske qosylatyny aityldy. Joba eki kezeńmen júzege asyrylady, oǵan Resei men Qazaqstan kompaniialary qatysady. Birinshi kezeńniń ashylýy 2026 jyldyń sońyna josparlanǵan, ekinshi kezeńi 2028 jyly iske qosylady. 2 myń jumys orny ashylady dep kútilýde. Qazirgi ýaqytta joba-smetalyq qujattama ázirlenip jatyr. Sondai-aq, sý, gaz, elektr energiiasyn, kanalizatsiia men telefon bailanysyn tartý boiynsha tehnikalyq sharttar alyndy.
