رەسەي قازاقستاننان بيداي، قىزاناق جانە بۇرىش تاسىمالىنا قويىلعان شەكتەۋلەردى تولىعىمەن جويدى. تەك كۇنباعىس تۇقىمدارىنا قاتىستى شەكتەۋ ءوز كۇشىندە قالىپ وتىر. بۇل تۋرالى ق ر اۋىل شارۋاشىلىعى ءمينيسترى ايداربەك ساپاروۆ مالىمدەدى، دەپ جازادى Dalanews.kz.
"بۇل ماسەلە بويىنشا مەن ماسكەۋگە ارنايى باردىم، اۋىل شارۋاشىلىعى مينيسترىمەن، "روسسەلحوزنادزور" باسشىسىمەن كەزدەستىم. ءداندى، بۇرشاقتى، مايلى داقىلدار بويىنشا ماسەلەلەر ءوز شەشىمىن تاپتى. ۆاگوندار ءقازىر بۇرىنعىداي قاڭتارىلىپ تۇرمايدى. ءبىز مۇنى ەدەل-جەدەل شەشتىك، ەكسپورتتى جونەلتۋگە كىرىسەمىز. ءقازىر شەشىمى تابىلماعان جالعىز نارسە بار، بۇل گۇلدەرگە قاتىستى. ءبىراق بۇل ماسەلەنى دە شەشەمىز، ارى كەتكەندە 10 كۇندە"، - دەدى ساپاروۆ ۇكىمەت وتىرىسىندا.
ونىڭ ايتۋىنشا، قازاقستان ترانزيتىنە قاتىستى بارلىق شەكتەۋلەر قاراشا ايىندا الىنعان. الايدا، رەسەي تاراپى ونىمدەردى بىردەن كەمەگە تيەۋدى تالاپ ەتتى.
"ال كەمەگە تيەۋ ءۇشىن بىرنەشە ءجۇز ۆاگون، تۇرىپ قالاتىن جاعدايلاردى ەسكەرسەك، كوپ ۋاقىتتى قاجەت ەتەدى. سوندىقتان مەن قاڭتاردا اتتانىپ، جۇكتى اۋىستىرىپ تيەۋگە رۇقسات بەرۋ تۋرالى ماسەلەنى شەشىپ كەلدىم. ءقازىر ەكسپورت جاقسى ءجۇرىپ جاتىر. بۇدان باسقا، ءبىز ءقازىر باسقا نارىقتاردى دا ىزدەستىرۋدەمىز، بالتىق جاعالاۋى ارقىلى ەۋروپاعا شىعۋ ءۇشىن، باسەكەلەستىك بولۋ ءۇشىن"، – دەپ ءسوزىن تۇيىندەدى مينيستر.
2024 جىلدىڭ قازان ايىندا رەسەي قازاقستاننان بيداي، جاسىمىق، قىزاناق، بۇرىش، قاۋىن جانە كۇنباعىس تۇقىمىن اكەلۋگە ۋاقىتشا شەكتەۋلەر ەنگىزدى. "روسسەلحوزنادزور" مۇنىڭ سەبەبىن ونىمدەردە كارانتينگە جاتقىزىلعان وبەكتىلەردىڭ تابىلۋى دەپ تۇسىندەرگەن ەدى.
