قازاقستاندا قۇس ەتى وندىرىسىنە قاتىستى مەملەكەتتىك اۋديت ناتيجەسىندە شاعىن وندىرۋشىلەردىڭ مەملەكەتتەن قولداۋ الۋىنا كەدەرگى كەلتىرەتىن ءبىرقاتار توسقاۋىلدار انىقتالدى. بۇل تۋرالى جوعارى اۋديتورلىق پالاتانىڭ تاپسىرماسىمەن جۇرگىزىلگەن جوسپاردان تىس تالداۋدىڭ قورىتىندىسى مالىمدەدى، دەپ حابارلايدى Dalanews.kz.
اتالعان تالداۋدى باسەكەلەستىكتى قورعاۋ جانە دامىتۋ اگەنتتىگى جۇزەگە اسىرعان. ونىڭ ماقساتى — قۇس ەتىن ءوندىرۋ جانە وتكىزۋ نارىعىنداعى ۇستەم نەمەسە مونوپوليالىق جاعدايدى انىقتاۋ، باعا ديناميكاسىن ساراپتاۋ جانە مەملەكەتتىك قولداۋدىڭ باسەكەلەستىككە اسەرىن باعالاۋ بولدى.
تالداۋ ناتيجەسىندە 2024 جىلى قازاقستاندا 358،7 مىڭ توننا قۇس ەتى وندىرىلگەنى بەلگىلى بولدى. ونىڭ 42 مىڭ تونناسى ەكسپورتتالعان. الايدا يمپورت كولەمى 135،7 مىڭ توننانى قۇراپ، ىشكى نارىقتىڭ شامامەن 30%-عا جۋىق ۇلەسى شەتەلدىك ونىمگە تاۋەلدى ەكەنىن كورسەتتى.
باستى ماسەلە رەتىندە شاعىن وندىرۋشىلەر ءۇشىن مەملەكەتتىك سۋبسيدياعا قول جەتكىزۋ جولىنداعى اكىمشىلىك كەدەرگىلەر اتالدى. اتاپ ايتقاندا، ءوتىنىم بەرۋ مەرزىمدەرىنىڭ تىعىزدىعى، قۇجاتتاردىڭ كوپتىگى جانە راسىمدەردىڭ كۇردەلىلىگى سالدارىنان كوپتەگەن كومپانيالار قولداۋ الا الماي وتىر. بۇل – ناقتى وندىرىستىك الەۋەتى بار كاسىپورىنداردىڭ باسەكەگە قابىلەتتىلىگىن تومەندەتەتىن فاكتور.
سونىمەن قاتار سۋبسيديا العان كەيبىر ءىرى وندىرۋشىلەردىڭ تۇپكىلىكتى ءونىم باعاسى، كەرىسىنشە، قولداۋ الماعان كاسىپورىندارعا قاراعاندا جوعارى بولعانى انىقتالدى.
احۋالدى جاقسارتۋ ءۇشىن باسەكەلەستىكتى قورعاۋ جانە دامىتۋ اگەنتتىگى اۋىل شارۋاشىلىعى مينيسترلىگىنە ناقتى ۇسىنىمدار جولداعان. جوعارى اۋديتورلىق پالاتا بۇل ماسەلەنى تولىق باقىلاۋدا ۇستايتىنىن مالىمدەدى.
