Qazaqstanda qus eti óndirisine qatysty memlekettik aýdit nátijesinde shaǵyn óndirýshilerdiń memleketten qoldaý alýyna kedergi keltiretin birqatar tosqaýyldar anyqtaldy. Bul týraly Joǵary aýditorlyq palatanyń tapsyrmasymen júrgizilgen jospardan tys taldaýdyń qorytyndysy málimdedi, dep habarlaidy Dalanews.kz.
Atalǵan taldaýdy Básekelestikti qorǵaý jáne damytý agenttigi júzege asyrǵan. Onyń maqsaty — qus etin óndirý jáne ótkizý naryǵyndaǵy ústem nemese monopoliialyq jaǵdaidy anyqtaý, baǵa dinamikasyn saraptaý jáne memlekettik qoldaýdyń básekelestikke áserin baǵalaý boldy.
Taldaý nátijesinde 2024 jyly Qazaqstanda 358,7 myń tonna qus eti óndirilgeni belgili boldy. Onyń 42 myń tonnasy eksporttalǵan. Alaida import kólemi 135,7 myń tonnany qurap, ishki naryqtyń shamamen 30%-ǵa jýyq úlesi sheteldik ónimge táýeldi ekenin kórsetti.
Basty másele retinde shaǵyn óndirýshiler úshin memlekettik sýbsidiiaǵa qol jetkizý jolyndaǵy ákimshilik kedergiler ataldy. Atap aitqanda, ótinim berý merzimderiniń tyǵyzdyǵy, qujattardyń kóptigi jáne rásimderdiń kúrdeliligi saldarynan kóptegen kompaniialar qoldaý ala almai otyr. Bul – naqty óndiristik áleýeti bar kásiporyndardyń básekege qabilettiligin tómendetetin faktor.
Sonymen qatar sýbsidiia alǵan keibir iri óndirýshilerdiń túpkilikti ónim baǵasy, kerisinshe, qoldaý almaǵan kásiporyndarǵa qaraǵanda joǵary bolǵany anyqtaldy.
Ahýaldy jaqsartý úshin Básekelestikti qorǵaý jáne damytý agenttigi Aýyl sharýashylyǵy ministrligine naqty usynymdar joldaǵan. Joǵary aýditorlyq palata bul máseleni tolyq baqylaýda ustaitynyn málimdedi.
