جۋرناليستەر زەرتتەگەن قۇجات "رەسەي فەدەراسياسىنىڭ بەلورۋس باعىتىنداعى ستراتەگيالىق ماقساتتارى" دەپ اتالادى. 17 بەتتىك قۇجات 2021 جىلعى جازدا دايىندالعان. ونى رف پرەزيدەنت اكىمشىلىگى، رف سىرتقى بارلاۋ قىزمەتى، فەدەرالدىق قاۋىپسىزدىك قىزمەتى، مەملەكەتتىك بارلاۋ باسقارماسى جانە رەسەي باس شتابى ازىرلەگەن.
قۇجاتتا رەسەي بيلىگىنىڭ بەلارۋستاعى ساياسي، قورعانىس، ساۋدا جانە الەۋمەتتىك ماقساتتارى ءۇش ءتۇرلى ساناتقا بولىنگەن - قىسقا مەرزىمى (2022 جىلعا دەيىن)، ورتاشا مەرزىمى (2025 جىلعا دەيىن) جانە ۇزاق مەرزىمى (2030 جىل).
اتاپ ايتقاندا، كرەمل تۇپتەپ كەلگەندە ورىس ءتىلىنىڭ بەلورۋس تىلىنە ۇستەمدىك قۇرعانىن، بەلورۋس زاڭنامالارىن رەسەي زاڭدارىنا باعىنىشتى ەتۋدى، سونىمەن بىرگە ەلدىڭ قوعامدىق-ساياسي ءومىرىن، ساۋداسىن، عىلىم مەن مادەنيەتىن باعىندىرۋدى كوزدەيدى.
بۇعان قوسا رەسەي 2030 جىلعا دەيىن بەلارۋستىڭ اسكەري-ساياسي سەكتورىنا باقىلاۋ ورناتۋدى جوسپارلاعان. رەسەي بارلاۋ قىزمەتىنىڭ مىندەتى - "ۇلتشىل جانە باتىسشىل" كۇشتەردىڭ ىقپالىن شەكتەۋ، بەلارۋس كونستيتۋسياسىن رەسەي مۇددەسىن ەسكەرە وتىرىپ رەفورمالاۋدى اياقتاۋ.
سونىمەن بىرگە رەسەي پرەزيدەنتى اكىمشىلىگى ونجىلدىق اياعىنا دەيىن بەلارۋس اقپارات كەڭىستىگىنە تولىق باقىلاۋ ورناتقىسى كەلەدى.
2030 جىلعا قاراي رەسەي بەلارۋستا ءبىرىڭعاي مەملەكەتتىك ەمتيحان تاپسىرۋ مەكەمەسىن، بۇعان قوسا موگيليەۆ، گرودنو جانە ۆيتەبسكىدە جاڭا عىلىم مەن مادەنيەت ورتالىقتارىن اشۋدى جوسپارلاعان. جۋرناليستەردىڭ پىكىرىنشە، مۇنداي مەكەمەلەردە كوبىنە رەسەيلىك بارلاۋشىلار مەن ىقپال ەتۋ اگەنتتەرى جاسىرىنادى.
باتىستىڭ ارنايى قىزمەتتەرىنىڭ وسى قۇجاتپەن تانىسقان وكىلدەرى دە جۋرناليستەر بولجامىن قۋاتتاپ وتىر.
