ٶتە دەۋلەتتٸ شەتەل ازاماتتارىنا اقش-تا ٶمٸر سٷرٸپ, جۇمىس ٸستەۋٸنە مٷمكٸندٸك بەرەتٸن "التىن كارتالار" ساتىلىمعا شىققالى جاتىر. ونى يەلەنگەندەر, تٷپتٸڭ تٷبٸندە اقش ازاماتتىعىن دا الا الادى. بۇل تۋرالى اقش پرەزيدەنتٸ دونالد ترامپ ارنايى باسپاسٶز مەسليحاتى كەزٸندە مەلٸمدەدٸ. ول مۇنداي ەرەكشە كارتانىڭ قۇنى شامامەن 5 ملن دوللار بولاتىنىن دا ناقتىلادى, دەپ جازادى Dalanews.kz.
"بٸز "التىن كارتانى" ساتۋدى باستايمىز. گرين-كارتاڭىز بار ما, مٸنە التىن كارتا دەگەن سول. بٸز ونىڭ قۇنىن بەلگٸلەۋدٸ جوسپارلاپ وتىرمىز, شامامەن 5 ميلليون دوللار, تۋرا گرين-كارتا بەرەتٸن بارلىق ارتىقشىلىقتار ول ارادا دا قامتىلادى, ونىڭ ٷستٸنە ول سٸزگە ازاماتتىق الۋعا جول اشادى. وسى كارتانى ساتىپ الۋ ارقىلى باي ادامدار بٸزدٸڭ ەلٸمٸزگە كٶشٸپ كەلەتٸن بولادى", – دەدٸ ترامپ CNN تەلەارناسىنا بەرگەن سۇقباتىندا.
بۇل ارادا كارتانىڭ "ازاماتتىققا جول اشادى" دەپ بەكەر ايتىلىپ وتىرعان جوق. اقش-تىڭ ساۋدا مينيسترٸ گوۆارد ليۋتنيكتٸڭ ايتۋىنشا, جاڭا "التىن كارتا" قازٸرگٸ EB-5 يمميگراتسييالىق ۆيزانى بەرۋ جٶنٸندەگٸ باعدارلامانىڭ دا فۋنكتسيياسىن اتقارادى. بۇعان دەيٸن EB-5 باعدارلاماسى ارقىلى اقش-قا ينۆەستيتسييا سالۋعا نيەتتٸ شەتەلدٸكتەرگە تۇراقتى تۇرۋعا رۇقسات (گرين-كارتا) بەرٸلٸپ كەلگەن.
پرەزيدەنت ترامپ, تٸپتٸ وسىنداي "التىن كارتالاردىڭ" ەكٸ اپتادان كەيٸن ساتىلىمعا شىعاتىنىن دا جەتكٸزدٸ. ول قازٸردٸڭ ٶزٸندە مۇنداي كارتانىڭ ميلليونى ٶتكەلٸ تۇرعانىن جەتكٸزدٸ.
"قۇقىقتىق تۇرعىدان العاندا, بۇل, سٶزسٸز, زاڭدى دٷنيە", - دەدٸ ترامپ.
جۋرناليستەر باسپاسٶز مەسليحاتىندا: "مۇنداي كارتا رەسەيلٸك وليگارحتارعا ساتىلۋى مٷمكٸن بە" دەگەن ساۋالدى العا تارتا كەتتٸ.
- يە, مٷمكٸن. ٶز باسىم, بٸرنەشە رەسەيلٸك وليگارحتى تانيمىن, جاپ-جاقسى ادامدار, - دەپ DW ترامپتىڭ سٶزٸن كەلتٸرەدٸ.
بۇعان دەيٸن زەلەنسكيي ترامپتىڭ ۇسىنىسىن قابىلداعانىن, ۋكراينا مەن اقش سيرەك مەتالدار جٶنٸندە كەلٸسٸمگە قول قويعانىن جازعانبىز.
