اتىراۋ وبلىسى قۇلسارى قالاسىنداعى №6 مەكتەپتە بولعان وقيعاعا قاتىستى بالانىڭ اناسى جاعدايدىڭ قالاي ٶربٸگەنٸن ايتىپ بەردٸ. ونىڭ سٶزٸنشە, وقيعاعا دەيٸن ۇلى ۇزاق ۋاقىت بويى ەلٸمجەتتٸك كٶرگەن, دەپ حابارلايدى Dalanews.kz.
اناسىنىڭ ايتۋىنشا, ساباق ٷستٸندە سىنىپتا وتىرعان بالانى تٶرت وقۋشى شاقىرىپ الىپ, مەكتەپ دەرەتحاناسىندا قىسىم كٶرسەتكەن ەرٸ نامىسىنا تيەتٸن سٶزدەر ايتقان. وسى جاعدايدان كەيٸن اشۋعا بۋلىققان جاسٶسپٸرٸم ولاردى قورقىتۋ ماقساتىندا سوڭدارىنان بالتامەن جٷگٸرگەن.
سونداي-اق اناسى ۇلىنىڭ مەكتەپكە بارعىسى كەلمەيتٸنٸن بٸرنەشە رەت ايتقانىن جەتكٸزدٸ. الايدا اتا-اناسى ونى سابىرعا شاقىرىپ, وقۋىن جالعاستىرۋعا كٶندٸرگەن.
"بالام اۋىرمايدى, دەنٸ ساۋ. ۆيدەودان قاراساڭىزدار, ول تەك ٶزٸنە تيٸسٸپ جٷرگەن بالالاردىڭ سوڭىنان عانا جٷگٸرگەن. بۇرىن دا “مەكتەپكە بارسام, ماعان بٸردەڭە بولۋى مٷمكٸن” دەپ جيٸ ايتاتىن. بٸز ونى “بٸر جىلىڭ قالدى, شىدا” دەپ جۇباتاتىنبىز", – دەيدٸ ول.
اناسىنىڭ سٶزٸنشە, مەكتەپتە ەلٸمجەتتٸك تۋرالى شاعىمدانعان بالالاردى "تەرپيلا" دەپ اتاپ, سونىڭ سالدارىنان وقۋشىلار كٶرگەن قورلىعى تۋرالى اشىق ايتا بەرمەيدٸ.
ول بۇل جاعدايعا بٸرجاقتى باعا بەرمەۋ كەرەگٸن ايتىپ, وقيعاعا "بۋللينگ" سەبەپ بولۋى مٷمكٸن ەكەنٸن اتاپ ٶتتٸ. سونىمەن قاتار ەشبٸر اتا-انا بالاسىنىڭ جامان جولعا تٷسۋٸن قالامايتىنىن جەتكٸزدٸ.
