Atyraý oblysy Qulsary qalasyndaǵy №6 mektepte bolǵan oqiǵaǵa qatysty balanyń anasy jaǵdaidyń qalai órbigenin aityp berdi. Onyń sózinshe, oqiǵaǵa deiin uly uzaq ýaqyt boiy álimjettik kórgen, dep habarlaidy Dalanews.kz.
Anasynyń aitýynsha, sabaq ústinde synypta otyrǵan balany tórt oqýshy shaqyryp alyp, mektep dárethanasynda qysym kórsetken ári namysyna tietin sózder aitqan. Osy jaǵdaidan keiin ashýǵa býlyqqan jasóspirim olardy qorqytý maqsatynda sońdarynan baltamen júgirgen.
Sondai-aq anasy ulynyń mektepke barǵysy kelmeitinin birneshe ret aitqanyn jetkizdi. Alaida ata-anasy ony sabyrǵa shaqyryp, oqýyn jalǵastyrýǵa kóndirgen.
"Balam aýyrmaidy, deni saý. Videodan qarasańyzdar, ol tek ózine tiisip júrgen balalardyń sońynan ǵana júgirgen. Buryn da “mektepke barsam, maǵan birdeńe bolýy múmkin” dep jii aitatyn. Biz ony “bir jylyń qaldy, shyda” dep jubatatynbyz", – deidi ol.
Anasynyń sózinshe, mektepte álimjettik týraly shaǵymdanǵan balalardy "terpila" dep atap, sonyń saldarynan oqýshylar kórgen qorlyǵy týraly ashyq aita bermeidi.
Ol bul jaǵdaiǵa birjaqty baǵa bermeý keregin aityp, oqiǵaǵa "býlling" sebep bolýy múmkin ekenin atap ótti. Sonymen qatar eshbir ata-ana balasynyń jaman jolǵa túsýin qalamaitynyn jetkizdi.
