ماڭعىستاۋ وبلىسىنداعى جاڭاوزەن قالاسىندا جاڭا سپورتتىق-ساۋىقتىرۋ كەشەنىنىڭ قۇرىلىسى باستالدى، – دەپ حابارلايدى Dalanews.kz ماڭعىستاۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
بۇل جوبا ءوڭىر جاستارىنا ارنالعان دەنە شىنىقتىرۋ مەن سپورتتى دامىتۋعا باعىتتالعان ماڭىزدى باستاما. سپورت كەشەنى حالىقارالىق ستاندارتتارعا ساي سالىنىپ، تۇرعىندار ءۇشىن جاڭا مۇمكىندىكتەر اشادى.
مەملەكەت باسشىسى قاسىم-جومارت توقايەۆ ءوز جولداۋىندا: «بۇقارالىق سپورتقا، دەنە تاربيەسىنە جانە بالالارعا باسىمدىق بەرۋ كەرەك. ءار وبلىستا، ءىرى اۋدان ورتالىقتارىندا سپورت ۇيىرمەلەرىن اشۋ قاجەت»، – دەپ اتاپ وتكەن بولاتىن.
سول يگىلىكتى ىستەردىڭ ءبىرى – ماڭعىستاۋ وبلىسىنىڭ جاڭاوزەن قالاسىندا بوي كوتەرەتىن زاماناۋي سپورتتىق-ساۋىقتىرۋ كەشەنى. بۇل اۋقىمدى جوبانى جۇزەگە اسىرۋعا ەلىمىزدەگى ەڭ ءىرى قايىرىمدىلىق ۇيىمداردىڭ ءبىرى – تيمۋر قۇلىبايەۆتىڭ Halyk قايىرىمدىلىق قورى ۇيىتقى بولىپ وتىر.
بۇل باستاما – ەل بولاشاعى سانالاتىن جاس ۇرپاقتىڭ دەنساۋلىعىن نىعايتۋعا، ولاردى وتانسۇيگىشتىك پەن بەلسەندى ءومىر سالتىنا باۋلۋعا باعىتتالعان ناقتى قادام. پرەزيدەنت تاپسىرماسى بۇگىندە شىنايى ىستەرمەن ۇشتاسىپ، ەلىمىزدىڭ تۇكپىر-تۇكپىرىندە وڭ ناتيجەسىن بەرە باستادى.
كەشەننىڭ ءىشى حالىقارالىق ستاندارتتارعا تولىقتاي ساي جابدىقتالىپ، كوپفۋنكسيونالدى جاتتىعۋ جانە كۇرەس زالدارى، كيىم اۋىستىراتىن بولمەلەر مەن دۋش كابينالارى، سپورت قۇرالدارىن ساقتايتىن قويمالار، اكىمشىلىك جانە تەحنيكالىق بولمەلەرمەن قامتىلادى. سونداي-اق بەينەباقىلاۋ جۇيەسى مەن ءورت قاۋىپسىزدىگى تالاپتارى دا تولىق ەسكەرىلگەن. جالپى اۋماعى 3،87 گەكتاردى قۇرايتىن نىسان 9 اي ىشىندە پايدالانۋعا بەرىلمەك. جوبانىڭ جالپى قۇنى – 1،5 ميلليارد تەڭگە.
حالقى تىعىز قونىستانعان، جاستار ۇلەسى جوعارى جاڭاوزەن قالاسى ءۇشىن مۇنداي نىسان اسا قاجەت. كەشەننىڭ ارتىقشىلىقتارى:
- قالا تۇرعىندارى سپورتپەن تەگىن جانە قولجەتىمدى تۇردە اينالىسا الادى
- بالالار مەن جاسوسپىرىمدەرگە ارنالعان ۇيىرمەلەر مەن سەكسيالار اشىلادى
- كاسىبي سپورتشىلار ءۇشىن جاتتىعۋ بازاسى قالىپتاسادى، جارىستار وتكىزۋ مۇمكىندىگى پايدا بولادى
- جاڭا جۇمىس ورىندارى اشىلادى
- جاستاردىڭ بوس ۋاقىتىن ءتيىمدى وتكىزۋىنە جاعداي جاسالادى
– جاڭاوزەن قالاسىنىڭ جاستارى مەن تۇرعىندارى ءۇشىن وسىنداي زاماناۋي سپورتتىق-ساۋىقتىرۋ كەشەنىن سالۋعا قولداۋ كورسەتكەنى ءۇشىن Halyk قورىنا شىنايى العىسىمىزدى بىلدىرەمىز. بۇل نىسان قالامىزدىڭ الەۋمەتتىك ينفراقۇرىلىمىن نىعايتىپ قانا قويماي، جاس ۇرپاقتىڭ سالاۋاتتى ءومىر سالتىن ۇستانۋىنا جانە سپورتقا دەگەن قىزىعۋشىلىعىن ارتتىرۋعا زور سەرپىن بەرەتىنىنە سەنىمدىمىز. ءبىز جاستاردىڭ جارقىن بولاشاعى جولىندا بارلىق جاعدايدى جاساۋعا ءاردايىم دايىنبىز، – دەيدى جاڭاوزەن قالاسىنىڭ اكىمى جانسەيىت قايناربايەۆ.
جاڭاوزەندە بوي كوتەرەتىن بۇل كەشەن – تەك سپورتپەن شۇعىلداناتىن عيمارات قانا ەمەس. بۇل – جاستاردىڭ بوس ۋاقىتىن ءتيىمدى وتكىزۋىنە، ومىرلىك داعدىلارىن شىڭداۋىنا، مىقتى ەرىك-جىگەر مەن تارتىپكە باۋلۋىنا جول اشاتىن رۋحاني-الەۋمەتتىك ورتا.
– وڭىرلەردىڭ دامۋىنا تۇراقتى قولداۋ كورسەتۋ – ءبىزدىڭ باستى قاعيداتىمىز. اسىرەسە جاستارعا ارنالعان جوبالارعا ەرەكشە ءمان بەرەمىز. ويتكەنى بۇگىنگى بۋىن – ەرتەڭگى قازاقستاننىڭ تىرەگى. سپورتتىق-ساۋىقتىرۋ كەشەنى – قوعام دەنساۋلىعىن نىعايتاتىن، الەۋمەتتىك ءال-اۋقاتتى ارتتىراتىن ستراتەگيالىق باستاما، – دەيدى Halyk قورىنىڭ ديرەكتورى ساعىنبەك شۇڭكەيەۆ.
2023 جىلدان باستاپ قۇلىبايەۆتىڭ قورى ماڭعىستاۋ وبلىسىن دامىتۋعا 5 ميلليارد تەڭگە ءبولدى. قاراجات جەرگىلىكتى حالىقتىڭ قاراجات جەرگىلىكتى تۇرعىنداردىڭ ءومىرىن جاقسى جاققا وزگەرتەتىن رەسۋرستارمەن جانە ينفراقۇرىلىممەن قامتاماسىز ەتەتىن الەۋمەتتىك ماڭىزدى باستامالاردى ىسكە اسىرۋعا باعىتتالعان.
Halyk قورىنىڭ وڭىردەگى ەڭ ماڭىزدى باستامالارى:
- بەينەۋ استىق تەرمينالىن قايتا جانداندىرۋ – ءوڭىردىڭ ازىق-تۇلىك قاۋىپسىزدىگىن نىعايتاتىن ستراتەگيالىق ماڭىزدى جوبا.
- اقشۇقىر جانە س. شاپاعاتوۆ اۋىلدارىنا ارنالعان تۇششىلاندىرۋ قوندىرعىسى – 25 000-نان استام تۇرعىندى تازا اۋىز سۋمەن قامتاماسىز ەتتى.
- جاڭاوزەندە زاماناۋي بالالار الاڭدارى مەن فۋتبول الاڭدارىن سالۋ – بالالار مەن جاستاردىڭ بەلسەندى دەمالىسى مەن دامۋى ءۇشىن ارنايى ايماقتار قۇرىلعان.
