– ۇلتتىق كەڭەستىڭ حاتشىلىعى ماعان ەسەپ بەرىپ وتىر. بۇل رەتتە بيلىكتىڭ ديالوگ ورناتۋعا جانە رەفورما جاساۋعا مۇددەلى ەكەنىنە ەشكىمنىڭ كۇمانى جوق دەپ ويلايمىن.
سىزدەردىڭ كوپشىلىگىڭىزبەن جەكە كەزدەستىم. ۇسىنىستارىڭىزدى، باستامالارىڭىزدى مۇقيات قاراستىرىپ، ءبىرقاتار وزەكتى ماسەلەلەر جونىندە پىكىر الماستىق، – دەپ اتاپ ءوتتى مەملەكەت باسشىسى.
قازاقستان پرەزيدەنتى ۇلتتىق كەڭەس مۇشەلەرى جۇمىس بارىسىندا قىزۋ پىكىرتالاسقا ءتۇسىپ، ماڭىزدى جاعدايلاردى تالقىلاعانىن اتاپ ءوتتى.
– سونىڭ بارىسىندا اتاپ ءوتۋى كەرەك، ءبىرقاتار تۇيتكىلدى ماسەلە بويىنشا ورتاق ۇستانىمعا كەلدىك. بۇل دەموكراتيانى نىعايتۋعا جانە قوعامنىڭ بيىلككە دەگەن سەنىمىن ارتتىرۋعا ۇلكەن سەرپىن بەرەتىن جۇمىس.
ءبىزدىڭ تاجىريبەمىز حالىقارالىق ۇيىمدار تاراپىنان جوعارى باعالانىپ وتىر. كوپشىلىك ونى جاۋاپتى ءارى سىندارلى ديالوگتىڭ ۇلگىسى رەتىندە قابىلدادى.
ەڭ باستىسى ۇلتتىق كەڭەس قوعامنىڭ سەنىمىن اقتاي الاتىنىن دالەلدى. مۇنىڭ تاعى ءبىر ماڭىزدى قىرى بار. ءبىز سىندارلى ديالوگ ارقىلى جاڭا ساياسي مادەنيەتتىڭ نەگىزىن قالىپتاستىرىپ جاتىرمىز. سونىڭ ارقاسىندا سانالۋان پىكىرلەر مەن بالاما كوزقاراستار، سىندارلى ۇستانىم، جاۋاپكەرشىلىك سياقتى قۇندىلىقتار الدىڭعى قاتارعا شىعادى، – دەدى مەملەكەت باسشىسى.
