باسقوسۋدىڭ باستى ماقساتى – تەمىرجول قىزمەتكەرلەرىنە سىبايلاس جەمقورلىققا قارسى زاڭناماعا ەنگىزىلگەن وزگەرىستەردى ءتۇسىندىرۋ. ەستەرىڭىزگە سالساق، ۇستىمىزدەگى جىلى ەلىمىزدىڭ ءبىرقاتار زاڭناماسىنا وزگەرىستەر مەن تولىقتىرۋلار ەنگىزىلىپ، وعان قاراشا ايىندا مەملەكەت باسشىسى قاسىم-جومارت توقايەۆ قول قويعان.
سول زاڭداردىڭ اراسىندا مەملەكەتتىك قىزمەت جانە جەمقورلىققا قارسى كۇرەس زاڭناماسى دا بولعان. زاڭعا ەنگىزىلگەن وزگەرىستەر بويىنشا قانداي دا ءبىر قىزمەتكەر سىبايلاس جەمقورلىق بويىنشا ءىستى بولسا، زاڭ ولاردىڭ باسشىلارىن دا جاۋاپكەرشىلىككە تارتۋ كوزدەيدى.
«سىبايلاس جەمقورلىققا قارسى كۇرەس تۋرالى» زاڭنىڭ 22 بابى بويىنشا جەمقورلىق وقيعاسى ورىن العاندا بارلىق مەملەكەتتىك ورگاندار، ۇيىمدار، كۆازيمەملەكەتتىك سەكتور مەن وكىلەتتى تۇلعالار جاۋاپكەرشىلىكتى بولىسەتىن بولدى.
تەمىرجول كومپانياسىنىڭ باسشىسىنا باعىنىشتى قىزمەتكەرلەر قانداي دا ءبىر جەمقورلىق وقيعاسىمەن شاتىلسا، باسشىسى تارتىپتىك جازاعا تارتىلادى. ارينە، مۇنداي وقيعالار «قتج» ۇك» اق-ىندا ورىن الماۋى ءتيىس. بۇل ءۇشىن تەمىر جول سالاسىنىڭ بارلىق قۇرىلىمىندا جەمقورلىققا قارسى كۇرەس شارالارى كۇشەيتىلىپ، ونىڭ وزەكتىلىگىن ءتۇسىندىرۋ باعىتىندا كوپتەگەن جۇمىستار ءجۇرىپ جاتىر.
الداعى 2020 جىلى كومپانيادا ادالدىق قاعيدالارىن قالىپتاستىرىپ، سىبايلاس جەمقورلىققا توزبەۋشىلىكتىڭ پريسيپتەرىن كەڭىنەن ناسيحاتتاۋ كوزدەلۋدە.
بۇگىندە تەمىرجول سالاسىنداعى جەمقورلىقتى بولدىرماۋ جانە ونىڭ الدىن الۋ ىسىمەن «ادال جول» جوبالىق كەڭسەسى اينالىسۋدا. بۇل جوبا جەمقورلىققا قارسى كۇرەس اگەنتتىگىمەن بىرلەسىپ قۇرىلعان.
ۇستىمىزدەگى جىلى جوبالىق كەڭسە مەن «قتج» ۇك» اق بىرلەسىپ، كومپانيا ىشىندە كوپتەگەن جۇمىستار اتقاردى. ناتيجەسى وتە جوعارى.
ايتالىق، ق ر ينۆەستيسيا جانە دامۋ مينيسترلىگىنىڭ 2019 جىلى 2 تامىزىندا تەمىرجول بيلەتتەرىن قايتا ساتۋعا، جولاۋشىلار مەن جۇك تاسىمالداۋ تارتىپتەرىنە ەنگىزگەن وزگەرىستەر مەن كاسىپكەرلىك-ۇردىستەردى اۆتوماتتاندىرۋ باعىتىندا قولعا الىنعان جۇمىس ناتيجەسىندە جولاۋشىلارعا كورسەتىلەتىن قىزمەت پەن تەمىرجولداعى جۇمىس ساپاسى ايتارلىقتاي ارتقانىن اتاپ ايتۋعا بولادى.
ماسەلەن، جول ءجۇرۋ بيلەتتەرىنىڭ ەلەكتروندى ساتۋ جۇيەسىن جەتىلدىرۋ ءىسى جاساندى بيلەت تاپشىلىعىنىڭ جولىن كەسكەن. سول سياقتى ەلەكتروندى كەزەك كۇتۋ جۇيەسى دە جۇمىستىڭ ساپاسىنىڭ جاقسارۋىنا ىقپال ەتكەن.
قاندايدا ءبىر جاعدايمەن جول جۇرۋدەن باس تارتقان جولاۋشىنىڭ بيلەتىن ەلەكتروندى كەزەكتە تۇرعان كەلەسى ادامنىڭ ساتىپ الاتىن مۇمكىندىك تۋدى. جاڭا جۇيە بويىنشا جولاۋشى بيلەتىن وتكىزگەن جاعدايدا كەلەسى ادامنىڭ جەكە ەلەكتروندى كابينەتى مەن ەلەكتروندى پوشتاسىنا اقپارات كەلىپ تۇسەدى. بۇدان كەيىن كليەنت 2 ساعاتتىڭ ىشىندە تولەم جاساپ، وزىنە تيەسىلى بيلەتتى الۋى كەرەك. ەگەر كليەنت بەلگىلەنگەن مەرزىم ارالىعىندا تولەم جاساماسا، ونىڭ ءوتىنىشى اۆتوماتتى تۇردە جويىلىپ، بيلەت كەلەسى ادامعا وتەدى.
وسىلايشا بيلەت ساتۋ جۇيەسىنە ەنگىزىلگەن وزگەرىستەر ۆوكزالدا بيلەت ىزدەپ سابىلعان حالىقتىڭ «الىپساتارلاردىڭ» ارباۋىنا تۇسپەۋىنە ىقپال ەتىپ وتىر. تاعى دا ايتساق، bilet.railways.kz سايتىنىڭ اكىمشىلەرى شامادان تىس جول ءجۇرۋ بيلەتىن ساتىپ الۋعا ۇمتىلعان 60-تان استام قولدانۋشىلاردى بۇعاتتاعان.
سونىمەن قاتار توپتاسقان جولاۋشىلاردىڭ ءوتىنىشىن قابىلداۋ جۇيەسى اۆتوماتتاندىرىلعانىن ايتا كەتۋىمىز كەرەك.
بۇدان باسقا بوتەن بىرەۋدىڭ اتىمەن جول ءجۇرۋ بيلەتىن راسىمدەيتىن الاياقتاردىڭ دا جولى كەسىلدى. ءبىر سوزبەن ايتساق جول كولىگىن ەلەكتروندى فورماتتا راسىمدەيتىن bilet.railways.kz سايتى تولىقتاي وزگەرتىلىپ، جاڭارتىلدى.
جاڭا سايتتان كەز كەلگەن ادام بارلىق مارشرۋتتاردى باقىلاي الادى. سايتتان جولاۋشىلار ءاربىر مارشرۋتتى ءجۇرۋ ۋاقىتى مەن ءاربىر ستانساعا قاي ۋاقىتتا كەلەتىنىن ۇيدەن شىقپاي بىلە الادى. جاڭا سايتتىڭ ۇيالى تەلەفونداعى ءموبيلدى نۇسقاسى دا جۇمىس ىستەپ تۇر.
كەز كەلگەن جولاۋشى سايتتىڭ قىزمەتىن پايدالانىپ، بيلەت ساتىپ الۋ بارىسىندا ۋاقىتىن ۇنەمدەي الادى. ەگەر جولاۋشىنىڭ بارار جەرى جاقىن بولسا، ول سايتتا وتىرىپ بيلەت قۇنىنان جاتىن ورىنعا قاجەتتى كورپە جاستىقتىڭ تىسىن الىپ تاستاي الادى. مۇنداي جاعدايدا بيلەتتىڭ قۇنى ءبىرشاما تومەندەيتىنى بەلگىلى.
سونىمەن قاتار سايتقا تىركەلۋ بارىسى دا مەيلىنشە جەڭىلدەدى. بۇگىندە سايتتى قولدانۋشىلار سايتقا تىركەلگەنىن راستايتىن نومەردى جەكە پوشتاسىن اشىپ، ۇزاق كۇتىپ وتىرمايدى. قولدانۋشىنىڭ سايتقا تىركەلگەنى جايىنداعى اقپارات سول زاماتتا جولاۋشىنىڭ جەكە پوشتاسىنا كەلەدى.
وسىنداي جۇمىستىڭ ارقاسىندا الىپساتارلاردىڭ جاساندى بيلەت تاپشىلىعىن تۋدىرۋ ىسىنە توسقاۋىل قويىلدى.
بيلەت ساتۋ ءىسىن زامان تالابىنا ساي جەتىلدىرۋدىڭ ارقاسىندا ىشكى ريەۆيزيالىق قىزمەت تە جاندانا تۇسكەن. بۇدان باسقا بيلەتسىز جۇرەتىن جولاۋشىلار مەن راسىمدەلمەگەن جۇكتەردىڭ دە جولى كەسىلگەنىن اتاپ ايتۋعا بولادى.
بۇعان دەيىن باقىلاۋشى ريەۆيزورلار قتج-نىڭ اۋماقتىق قۇرىلىمدارىندا شتاتىندا جۇمىس ىستەپ كەلگەنى ەدى. وسىلايشا ولار ءبىر جەردە جىلدار بويى جۇمىس ىستەپ، وكىلەتتى مەملەكەتتىك ورگاندارمەن توننىڭ ىشكى باۋىنداي ارالاسىپ كەتكەنى جاسىرىن ەمەس.
سوڭعى قايتا قۇرىلىمداۋدان كەيىن ريەۆيزورلار شتاتى تولىقتاي وزگەرىپ، ولار «جولاۋشىلار تاسىمالى» اق-دان كەتىپ، كومپانيانىڭ ورتالىق كەڭسەسىنە باعىناتىن بولدى. ناتيجەسىندە ىشكى باقىلاۋ ءىسى ارتىپ، ءتارتىپ بۇزۋ وقيعالارى پىشاق كەسكەندەي تىيىلدى.
بۇگىندە جۇك تيەلگەن ۆاگوندى باسقارۋ ءىسى قاعاز تولتىرۋدان تولىقتاي كەتىپ، ەلەكتروندى فورماتقا كوشتى. كەلىسىمشارت نەگىزىندە جۇمىس ىستەيتىن كوممەرسيالىق جۇمىستار جۇيەسى اۆتوماتتاندىرىلعالى بەرى جۇكتەردى جونەلتىپ، قابىلداپ الاتىن تەمىرجولشىلاردىڭ جۇمىسى جاقسارىپ، ساپاسى ارتقان.
الداعى ۋاقىتتا كوممەرسيالىق نەگىزدە جۇك تاسىمالداۋ جۇيەسىن جەتىلدىرىپ، جۇك جونەلتۋدى جوسپارلاۋ، قۇجاتتاردى راسىمدەۋ، جەتكىزىلگەن جۇكتىڭ اقىسىن تولەۋ، الدىن الا اقپارات بەرۋ، شەكارالىق ارەكەتتەسۋدە ەركىن اقپارات الماسۋ ىستەرىن دامىتۋ قولعا الىنباق.
كەلىسىمشارت نەگىزىندە جۇمىس ىستەيتىن كوممەرسيالىق جۇمىستار جۇيەسى اۆتوماتتانعالى بەرى ەل ازاماتتارى جۇكتەرى ءدال ۋاقىتىندا كەلەتىنىن جانە حالىققا قولايلى ەكەنىن ايتىپ، جۇمىس بارىسىن جوعارى باعالاۋدا. قاعازباسىلىقتان باس تارتقاننىڭ ارقاسىندا قاجەتسىز كەلىسىمدەردى جويىپ، جولاۋشى جانە جۇك تاسىمالىنىڭ تيىمدىلىگى مەن جەدەل ارەكەت ەتۋىن قامتاماسىز ەتىپ وتىر. كليەنتتىڭ جەكە كابينەت ارقىلى اقشا اۋدارىمدارىن باقىلاۋ ءىسى مەيلىنشە جەڭىلدەگەنىن ايتا كەتۋىمىز كەرەك.
الداعى جىلى «ادال جول» جوباسى اياسىندا جەمقورلىققا قاتىستى تاۋەكەلگە تالداۋ، كومپانيانىڭ ورتالىق اپپاراتى مەن وعان باعىنىشتى قۇرىلىمداردا قىزمەتىن باعالاۋ ءىسى قولعا الىنباقشى. بۇدان كەيىن سول جۇمىستاردىڭ ناتيجەسىن باسشىلىققا الىپ، جەمقورلىقتى تۋدىراتىن جايتتاردى تۇبىرىمەن جويۋ كوزدەلۋدە.
الداعى ۋاقىتتا كومپانيا مەن ونىڭ ەنشىلەس مەكەمەلەرى اكتىلەر مەن بيزنەس-ۇردىستىڭ رەينجينيرينگىنە ريەۆيزيا جاسايتىن بولادى. وسىلايشا ءقازىر تەمىر جول سالاسىنداعى بارلىق قىزمەتتى ەلەكتروندى فورماتقا كوشىرۋ باعىتىندا قىزۋ جۇمىستار ءجۇرىپ جاتىر.
«قازاقستان تەمىر جولى» ۇك» اق-ى مەن
ق ر سىبايلاس جەمقورلىققا قارسى كۇرەس اگەنتتىگىنىڭ
باسپا ءسوز قىزمەتى
