سەنات دەپۋتاتتارى 2025 جىلعى 27 اقپاندا وتكەن جالپى وتىرىستا قازاقستان مەن رەسەي ۇكىمەتتەرى اراسىنداعى ءبىرىڭعاي ەنەرگەتيكالىق جۇيەلەردىڭ پاراللەل جۇمىس ىستەۋىن قامتاماسىز ەتۋ جونىندەگى شارالار تۋرالى كەلىسىمدەردى راتيفيكاسيالادى. جاڭا كەلىسىمگە سايكەس، ماسكەۋ ەندى قازاقستاننىڭ تاپشىلىعىن كوممەرسيالىق نەگىزدە جاباتىن بولادى، دەپ حابارلايدى Dalanews.kz.
سەناتور شاكارىم بۇقتۇعىتوۆتىڭ ايتۋىنشا، قازاقستاننىڭ ەنەرگەتيكالىق جۇيەسى رەسەي فەدەراسياسى مەن ورتالىق ازيا ەلدەرىنىڭ ەنەرگەتيكالىق جۇيەسىمەن پارالەلل رەجيمدە جۇمىس ىستەيدى. ەنەرگەتيكا مينيسترلىگى ۇسىنعان دەرەكتەرگە سايكەس، ءبىرىڭعاي ەنەرگەتيكالىق جۇيەدە سوڭعى جىلدارى قازاقستاننىڭ رەتتەۋشى قۋاتتار بويىنشا تاپشىلىعى بايقالادى. سونىمەن قاتار، وتاندىق ەلەكتر ستانسيالارداعى اۆاريالىق جانە جوسپاردان تىس جوندەۋ جۇمىستارى قازاقستان مەن رەسەيدىڭ ەنەرگوجۇيەلەرى اراسىنداعى ەلەكتر قۋاتى اعىندارىنىڭ رۇقسات ەتىلگەن ماندەرىنىڭ جۇيەلى تۇردە اسىپ وتىرۋىنا اكەلىپ سوققان.
"ءبىزدىڭ ەلىمىزدىڭ ەنەرگەتيكاسى ۇزاق ۋاقىت بويى ارتىشىلىقتا بولىپ كەلدى. 2021 جىلعا دەيىن ەلەكتر ەنەرگياسى مەن قۋاتتىڭ ءپروفيسيتى بايقالدى. الايدا، سوڭعى جىلدارى ءبىرقاتار وبەكتيۆتى سەبەپتەرگە بايلانىستى رەسپۋبليكامىزدىڭ ەنەرگەتيكالىق سالاسى دايەكتى تۇردە تاپشى سالاعا اينالۋدا. وسىنىڭ دالەلى - وتكەن جىل، ونىڭ قورىتىندىسى بويىنشا ءبىز رەسەيدەن 3،1 ملرد كۆتساع استام ەلەكتر ەنەرگياسىن يمپورتتاۋعا ءماجبۇر بولدىق"، - دەدى سەناتور.
تاپشىلىقتىڭ نەگىزگى سەبەپتەرى - ەنەرگيا جۇيەسىندەگى نەگىزگى جانە قوسالقى جابدىقتاردىڭ توزۋىنىڭ جوعارى دەڭگەيى، ەلەكتر جانە جىلۋ ەنەرگياسى تۇتىنىسىنىڭ جىل سايىنعى ءوسىمى، ءتيىمسىز تاريفتىك ساياسات جانە ەنەرگيا جۇيەلەرىن جاڭعىرتۋدا قاراجاتتىڭ جەتىسپەۋشىلىگى.
شاكارىم بۇقتۇعىتوۆ جەو-نىڭ جالپى سانىنىڭ 46% نەمەسە قولدانىستاعى بارلىق جىلۋ ورتالىعىنىڭ 17-سىندە جابدىقتاردىڭ ەسكىرۋى 70%-دان اساتىنىن ەسكە سالادى. ءبىرقاتار وڭىرلەردە جەو-لاردىڭ ازىپ-توزۋ دەڭگەيى 80%-دان اسادى. بارلىق جەو بويىنشا توزۋدىڭ ورتاشا دەڭگەيى 61%-دى، ال ورتاشا قولدانىس كەزەڭى 62 جىلدى قۇرايدى. مۇنىڭ ءبارى توتەنشە جاعدايلاردىڭ قايتالانۋ ءقاۋپىن تۋدىرادى.
كەلىسىمنىڭ ماقساتى - رەسەي فەدەراسياسىنان قازاقستان ءبىرىڭعاي ەلەكتر جۇيەسىنە بەرۋدى جوسپارلاپ وتىرعان جىل سايىنعى ەلەكتر ەنەرگياسىنىڭ كولەمىن كەلىسۋ، سونداي-اق ەلەكتر ەنەرگياسىن كوممەرسيالىق نەگىزدە ساتىپ الۋ جانە ساتۋ قۇنىن ايقىنداۋ بولىپ تابىلادى.
بۇعان دەيىن ءماجىلىس رەسەيمەن ءبىرىڭعاي ەنەرگەتيكالىق جۇيەلەردىڭ جۇمىسىن قامتاماسىز ەتۋ تۋرالى كەلىسىمدى راتيفيكاسيالادى. سوڭعى جىلدارى رەسەي فەدەراسياسىنان ەلەكتر ەنەرگياسىنىڭ اعىنى كەلىسىلىپ، ءوزارا رۇقسات ەتىلگەن +/- 150 مۆت كولەمىنەن ەداۋىر اسىپ كەتىپ وتىر. كەيبىر ساعاتتاردا قۋاتتىلىقتىڭ اۋىتقۋى 1500 مۆت-قا دەيىن جەتەدى.
بۇعان دەيىن سايتىمىزدا "ەنەرگەتيكالىق اپات: قاراعاندى وبلىسىنىڭ ءبىر اۋدانىندا توتەنشە جاعداي جاريالاندى" دەگەن ماتەريال جاريالانعان بولاتىن. ماقالادا شەت اۋدانىنداعى بىرنەشە ەلدىمەكەننىڭ جارىقسىز وتىرعانى تۋرالى جازىلعان.
