قوستاناي وبلىسى ءجىتىقارا قالاسىندا ورتتەن كوز جۇمعان بەس بالنىڭ اناسى 5-10 جىلعا دەيىن باس بوستاندىعىنان ايىرىلۋى مۇمكىن، دەپ حابارلايدى Dalanews.kz.
بۇل تۋرالى قوستاناي وبلىسىنىڭ پروكۋراتۋراسى Buzyq تەلەگرام ارناسىنا مالىمدەگەن. قازىرگى تاڭدا قىلمىستىق كودەكستىڭ “ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان ءورت قاۋىپسىزدىگى تالاپتارىن بۇزۋ” بابى بويىنشا سوتقا دەيىنگى تەرگەۋ جۇمىستارى باستالدى.
“مۇنداي جاعدايدا تەك باس بوستاندىعىنان ايىرۋ جازاسى قاراستىرىلعان، باسقاشا جازا تاعايىندالمايدى”، - دەيدى ارنا مالىمدەگەن حابارلامادا.
ەسكە سالايىق، 11 قازانعا قاراعان ءتۇنى قوستاناي وبلىسىندا جەكە ۇيدەن ءورت شىعىپ، كامەلەتكە تولماعان بەس بالا قازا تاپتى. بالالار ۇيدە جالعىز قالعان. التىنشى بالا امان قالعان.
"ناشا گازەتا" مالىمەتىنشە، قايعىلى وقيعا ساعات 04.29-دا بولعان.
"قۇتقارۋشىلار 7 مينۋتتىڭ ىشىندە كەلگەن. الايدا ءۇي تۇتاس ورتەنىپ كەتكەن"، - دەيدى جەرگىلىكتى اكىمدىك وكىلدەرى.
ءورت ساعات 06.08-دە تولىق سوندىرىلگەن.
ۇيدە 2011، 2016، 2018، 2019، 2022، 2023 جىلى تۋعان بالالار بولعان. ارالارىندا تەك 2011 جىلى تۋعان بالا امان قالعان.
"الدىن الا بولجام بويىنشا، ولاردىڭ اناسى كەشكى ۋاقىتتا تانىسىنا كەتكەن. كۇيەۋى باس بوستاندىعىنان ايىرىلعان. ءورتتىڭ قايدان شىققانى انىقتالىپ جاتىر"، - دەلىنگەن حابارلامادا.
