"قوسىمشا قۇن سالىعى بۇكىل سالا ءۇشىن وسپەيدى". ق ر پرەمەر-مينيسترىنىڭ ورىنباسارى – ۇلتتىق ەكونوميكا ءمينيسترى سەرىك جۇمانعارينمەن قارجى ءمينيسترى ءمادي تاكييەۆ جۋرناليستەرمەن كەزدەسۋ بارىسىندا وسىلاي دەدى، دەپ جازادى Dalanews.kz.
ايتا كەتسەك، قاڭتار ايىنىنڭ سوڭىندا مەملەكەت باسشىسىنىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا مينيسترلەر كابينەتى قوسىمشا قۇن سالىعى (ققس) مولشەرلەمەسىن 15%-دان 20%-عا دەيىن ارتتىرۋ جانە ققس بويىنشا تىركەۋ شەگىن 15 ملن تەڭگەگە دەيىن تومەندەتۋ كەرەكتىگىن ايتقان بولاتىن. بۇل جاڭاشىلدىق بيزنەس قاۋىمداستىعى ءۇشىن توبەدەن تۇسكەن جايمەن بىردەي بولىپ، ءار پلاتفورمادا ولار ءوز نارازىلىقتارىن ءبىلدىرىپ ۇلگەردى. اسىرەسە، اۋىلشارۋاشىلىعى سالاسىنداعىلار. الايدا سەرىك ءجۇمانعاريننىڭ ايتۋىنشا، اۋىل شارۋاشىلىعى سالاسى ءۇشىن ققس دەگەن مۇلدە بولماۋى دا مۇمكىن. جۋرناليستەرمەن بولعان كەزدەسۋدە ۇكىمەت مۇشەلەرى وسىنداي تۇسىنبەستىك بولماس ءۇشىن تالقىداعى سالىق جانە بيۋدجەت رەفورماسىنا قاتىستى ءبىرقاتار مالىمەتتەرگە ەگجەي-تەگجەي توقتالدى.
"مىسالى، ازىق-تۇلىك وندىرۋشىلەر ءۇشىن ءۇش نۇسقا تالقىلانۋدا: مولشەرلەمەنى 12% دەڭگەيىندە ساقتاۋ نەمەسە ونى 5%-عا دەيىن تومەندەتۋ، تاعى بولماسا ققس-تان مۇلدە بوساتۋ. فارماسيەۆتيكا سەكتورى ءۇشىن دە ققس 5%-عا دەيىن تومەندەۋى مۇمكىن. تۇرعىن ءۇي قۇرىلىسى سالاسىندا ققس ورنىنا ينفراقۇرىلىمدىق الىمدى ەنگىزۋ ۇسىنىلىپ وتىر"، - دەدى سەرىك جۇمانعارين.
مينيستر تۇرعىن ءۇي سالاسىنا قاتىستى ءققس-تى ينفراقۇرىلىمدىق الىممەن الماستىرۋ تۋرالى ۇسىنىستى بيزنەس قاۋىمداستىقتىڭ ءوزى العا تارتىپ وتىرعانىن جەتكىزدى.
"قۇرىلىس كومپانيا تولەيتىن ينفراقۇرىلىمدىق تولەمدى ەنگىزەتىن بولارمىز. ازىرگە ينفراقۇرىلىمدىق تولەمگە بايلانىستى 1 شارشى مەترى 40 دوللاردان 60 دوللارعا دەيىن. جاڭا ءبىر سالىق ءتۇرىن ويلاپ تاپپايمىز. باسپانانىڭ ساناتىنا قاراي وسىلاردى تالقىلاپ جاتىرمىز"، — دەدى سەرىك جۇمانعارين.
جۇمانعاريننىڭ ويىنشا، بۇل - بارىنە ۇناپ وتىرعان جاقسى ۇسىنىس.
"وسىنى ءقازىر قىزۋ تالقىلاۋدامىز. ەشبىر جاعدايدا ققس پەن الىم قاتار جۇرمەيدى. مۇمكىن وسى سالىق ءنول پايىز بولىپ، ورنىنا ينفراقۇرىلىم الىمى ءجۇرۋى مۇمكىن. نەمەسە ققس تومەندەيدى. ءبىراق بۇل ءبىز كوزدەپ وتىرعان 20%-دىق دەڭگەي ەمەس»، — دەدى پرەمەر-مينيستردىڭ ورىنباسارى.
ققس شەگىن تومەندەتۋگە قاتىستى سەرىك جۇمانعارين ءتۇرلى نۇسقالار تالقىلانىپ جاتقانىن، ءبىراق ەڭ ىقتيمالى ءقازىردىڭ وزىندە جاريالانعان 15 ملن تەڭگە دەڭگەيىندە ەكەنىن ايتتى. سونىمەن قاتار، بولشەك سالىقتى پايدالانا الاتىن كومپانيالاردىڭ سانى دا ايتارلىقتاي قىسقارادى.
ال بۇعان دەيىن كەيبىر كاسىپكەرلەرگە قاراستىرىلعان سالىقتىق جەڭىلدىك الىنسا، وندا ول ققس-قا قوسىمشا (ەگەر شەكتى ماننەن اسىپ كەتسە) كورپوراتيۆتىك تابىس سالىعىن (كتس) دا تولەيدى. وسىلايشا، مۇندايدا سالىق اۋىرتپالىعى 2-8%-دان (بولشەك ساۋدا سالىعى) 40%-عا (ۇسىنىلعان ققس جانە كتس مولشەرلەمەسى) دەيىن ارتادى.
جۇمانعارين مۇنىڭ بارلىعى ۇلتتىق قورعا جانە ەڭبەكاقى تولەۋ قورىنا تۇسەتىن جۇكتەمەنى ازايتۋعا مۇمكىندىك بەرەتىنىن ناقتىلايدى.
بۇعان دەيىن سايتىمىزدا "ققس مولشەرلەمەسىن ارتتىرۋعا قارسىمىز! بيزنەس قاۋىمداستىق پەتيسيا جوباسىن ازىرلەپ جاتىر" دەگەن ماقالا شىققان. "ەلىمىزدە قوسىمشا قۇن سالىعىن ءوسىرۋ كوزدەلىپ وتىر. ساراپشىلار قاۋىمى بۇعان نەگە قارسى" دەگەن ماقالامەن دە تانىسا وتىرىڭىزدار.
