– ليليا حانىم، قازىرگى تاڭدا ەلىمىز بويىنشا قانشا قوسىمشا ءبىلىم بەرۋ ۇيىمدارى بار؟ قازىرگى پاندەميا كەزىندە ولاردىڭ جۇمىسىن قالاي باعالايسىز؟ اڭگىمەمىزدى وسىدان باستاساق.
– قوسىمشا ءبىلىم بەرۋ جۇيەسى جالپى ءبىلىم بەرۋ جۇيەسىنىڭ اجىراماس ءبىر بولشەگى بولىپ تابىلادى. سوندىقتان ءبىلىمدى ۇرپاق دايىنداۋدا قوسىمشا ءبىلىم بەرۋ ۇيىمدارىنىڭ ماڭىزى زور.
ەندى سۇراعىڭىزعا جاۋاپ بەرسەم. قازىرگى تاڭدا ەلىمىزدە 1259 بالاعا قوسىمشا ءبىلىم بەرۋ ۇيىمدارى جۇمىس ىستەيدى. ونىڭ 806-سى تازا ءبىلىم بەرۋ سالاسىمەن بايلانىستى بولسا، 453ء-ى سپورت پەن مادەنيەت سالاسى بويىنشا قىزمەت اتقارادى. قازىرگى تاڭدا وسى قوسىمشا ءبىلىم بەرۋ ۇيىمدارىندا ميلليوننان استام بالا ءبىلىمىن جەتىلدىرۋدە.
بيىل جەر الەمدى شارپىعان پاندەميا دا ءبىزدىڭ جۇمىسىمىزعا ءوز سالقىنىن تيگىزدى. ەلىمىزدە كارانتين جاريالانعان كۇننەن باستاپ بىزدەر قوسىمشا ءبىلىم بەرۋ ۇيىمدارىندا جۇمىس ىستەيتىن پەداگوگتارى وقۋ ۇردىسىنە ادىستەمەلىك ۇسىنىمدار ەنگىزدىك. وسى رەتتە مەملەكەتتىك سانيتارلىق باقىلاۋ مەكەمەسى 15 بالاعا دەيىنگى شاعىن توپتاردا جۇمىس ىستەۋگە رۇقسات بەردى. وسىلايشا، قازىرگى تاڭدا بارلىق سانيتارلىق تالاپتاردى ساقتاپ، جۇمىسىمىزدى جالعاستىرىپ جاتىرمىز. ءار ايماقتىڭ پاندەميا كەزىندە جۇمىستى ۇيىمداستىرۋعا قاتىستى وزىندىك جوسپارلارى دايىندالىپ بەكىتكەن. سول جۇمىس جوسپارىنىڭ اياسىنان ءبىر ەلى دە اۋىتقىماي، جۇمىس ىستەپ جاتقان جايىمىز بار. ساباق كەستەلەرىنىڭ ءبارى اتا-انالارمەن كەلىسىلگەن.
– سوندا قوسىمشا ءبىلىم بەرۋ ۇيىمدارى بالالار ءۇشىن ونلاين ساباقتار وتكىزبەي مە؟
– جوق. ونلاين رەجيمدە ساباقتار ءجۇرىپ جاتىر. اڭگىمە اراسىندا ەلىمىزدە مادەنيەت پەن سپورت سالاسى بويىنشا دا قوسىمشا ءبىلىم بەرۋ ۇيىمدارى جۇمىس ىستەيتىنىن ايتتىق. ماسەلەن، مۋزىكا ۇيىرمەلەرىندە كەيبىر جەتكىنشەكتەر قانداي دا ءبىر اسپاپ بويىنشا ۇستازدارىنان جەكە جاعدايدا ءتالىم الادى. ال توپتىق جاعدايدا (15 ادامعا دەيىن) مۋزىكا تاريحى سىندى تەوريالىق ساباقتاردى بالالار بىرگە وقيدى. ساباق بارىسىندا بارلىق سانيتارلىقتار ساقتالۋى ماڭىزدى.
ونەر مەن مادەنيەت، سپورت سالاسى بويىنشا بالالاردى توپتىق وقىتۋ رەجيمى 1 قىركۇيەكتەن باستاپ قولعا الىنعان. ال ەلىمىز بويىنشا قوسىمشا ءبىلىم بەرۋ ۇيىمدارى 66 مىڭ بالاعا قاشىقتان ءبىلىم بەرۋدە. اتا-انالاردىڭ ءوتىنىشى بويىنشا 40 مىڭ بالا توپتىق رەجيمدە ءبىلىم السا، 30 مىڭعا جۋىق بالا جەكە وقىتىلىپ جاتقانىن ايتا كەتۋىمىز كەرەك.
ال 15 قىركۇيەكتەن باستاپ ەلىمىزدەگى وقۋشىلار سارايى، اۋلا كلۋبتارى، جاس ناتۋراليستەر، تەحنيكتەر ستانسالارى 500 مىڭنان بالاعا قاشىقتان ءبىلىم بەرۋدە. وسى رەتتە پاندەمياعا بايلانىستى بيىلعى وقۋ جىلىندا كوپتەگەن ءىس-شارالاردى ونلاين فورماتتا وتكىزۋگە ءماجبۇر بولىپ وتىرمىز.
– قوسىمشا ءبىلىم ۇيىمدارى بالالارعا ءتۇرلى باعىتتا ءبىلىم بەرەتىنى بەلگىلى. سول باعىتتاردى تارقاتىپ ايتساڭىز؟
– قازىرگى تاڭدا ەلىمىز بويىنشا قوسىمشا ءبىلىم بەرۋ ۇيىمدارى مۋزىكا، كوركەم-ەستەتيكا، عىلىمي-تەحنيكالىق ەكولوگيا، بيولوگيا، تۋريستىك ولكەتانۋ جانە الەۋمەتتىك پەداگوگيكالىق باعىت بويىنشا جاستاردىڭ ءبىلىمىن جەتىلدىرەدى.
– ءوزىڭىز اتاپ وتكەن باعىتتار بويىنشا قانداي ءىس-شارالاردى قاشىقتان ۇيىمداستىرىپ جاتىرسىزدار؟
– قوسىمشا ءبىلىم بەرۋ جۇيەسىندە باعىتتار بويىنشا ءىس-شارالاردى ۇيىمداستىرۋدىڭ ماڭىزى زور. ءىس-شارالار مەن ءتۇرلى وليمپيادالار ارقىلى بىزدەر بالالاردىڭ ءبىلىم دەڭگەيىن انىقتاپ، پەداگوگتاردىڭ جۇمىسىن باعالاۋعا بولادى. سوندىقتان بىزدەر قىركۇيەكتىڭ بەل ورتاسىنان باستاپ جوسپارلاعان ءىس-شارالارىمىزدى ونلاين-فورماتتا ۇيىمداستىرۋدى باستاپ كەتتىك.
ايتالىق، قازىرگى تاڭدا عىلىمي-تەحنيكالىق باعىتتا اۆيا جانە اۆتو مودەلدەۋ، روبوتقۇراستىرۋ، ماماندىق تاڭداۋ جانە مۋزىكا بويىنشا جىل سايىن ۇيىمداستىراتىن بايقاۋىمىز بيىل ونلاين-فورماتتا 53-رەت ۇيىمداستىرىلدى. بۇدان باسقا، «تابيعاتتى ايالا» دەپ اتالاتىن رەسپۋبليكالىق فورۋمىمىز جوعارى دەڭگەيدە ءوتىپ، جاس ەكولوگتارىمىز اتالمىش ءىس-شاراعا بەلسەنە قاتىستى. قولدانبالى ونەر باعىتى بويىنشا «التىن قازىنا» دەپ اتالاتىن بايقاۋىمىز دا جوعارى دەڭگەيدە ءوتتى.
– اڭگىمەڭىزگە راقمەت!
اينۇر جۇماحان.
