ازاتتىق سۇراعىنا جاۋابىنا قازاقستان قورعانىس ءمينيسترى نۇرلان ەرمەكبايەۆ وتستاۆكاعا كەتەتىنى تۋرالى ءوتىنىش بەرەتىنىن مالىمدەدى.
جامبىل وبلىسىنداعى توتەنشە وقيعادان كەيىن قازاقستان قورعانىس ءمينيسترى نۇرلان ەرمەكبايەۆ وتستاۆكاعا كەتۋدى ۇيعارعان. ەرمەكبايەۆ بۇل شەشىمىن ازاتتىققا جۇما كۇنى وتكەن باسپا ءسوز ءماسليحاتىنان كەيىن مالىمدەدى. ول جيىندا قورعانىس ءمينيسترى جامبىل وبلىسى بايزاق اۋدانىنداعى اسكەري بولىمدەگى جارىلىستان 4 اسكەري قازا تاۋىپ، ونداعان ادام جارالانعانىن جانە بىرنەشە كىسىنىڭ حابار-وشارسىز كەتكەنىن حابارلاعان ەدى.
ازاتتىق: بۇل ءسىز مينيستر بولىپ تۇرعان كەزدەگى ەكىنشى جارىلىس قوي. وسى وقيعادان كەيىن الەۋمەتتىك جەلىدە ءسىز جايلى "وتستاۆكاعا كەتسىن" دەگەن تالاپتار ايتىلىپ جاتىر. وعان نە دەپ جاۋاپ بەرەسىز؟
نۇرلان ەرمەكبايەۆ: مەنىڭ قازىرگى باستى ماقساتىم - تەز ارادا اپات سالدارىن جويۋ. ال وتستاۆكا ماسەلەسى تۋرالى ايتار بولساق، مەن وسى [جارىلىس بولعانى تۋرالى] حاباردى ەستىگەننەن كەيىن ءبىرىنشى مينۋتتا وتستاۆكاعا كەتۋدى سۇراپ ءوتىنىش بەرەمىن دەگەن شەشىم قابىلدادىم. ال قالعانىن جوعارعى باسشىلىق شەشەدى.
ازاتتىق: دەمەك وسى ماسەلە شەشىلگەننەن كەيىن وتستاۆكاعا كەتەتىنىڭىز انىق پا؟
نۇرلان ەرمەكبايەۆ: مەن [ءوزىمدى وتستاۆكاعا جىبەرۋدى] سۇرايمىن. ال قالاي بولادى، ونى جوعارعى باسشىلىق بىلەدى.
نۇرلان ەرمەكبايەۆتىڭ سوزىنشە، اسكەري قويمادا جارىلعان وق-دارىلەر وسىدان ەكى جىل بۇرىن ارىس قالاسىنان اكەلىنگەن.
2019 جىلى 24 ماۋسىمدا تۇركىستان وبلىسى ارىس قالاسىنداعى اسكەري ءوق-دارى قويماسى جارىلىپ، ءتورت ادام قازا تاپقان ەدى. جارىلىس بولعان كۇنى مىڭداعىن ءۇي زاقىمدانىپ، ارىستىڭ 40 مىڭنان استام تۇرعىنى شىمكەنت قالاسى مەن توڭىرەگىندەگى ەلدىمەكەندەرگە ەۆاكۋاسيالانعان.
بيىل 26 شىلدەدە شىمكەنت قالاسىنداعى اسكەري بولىمدە تۇركىستان وبلىسى ارىس قالاسىنداعى اسكەري قويماداعى جارىلىسقا قاتىستى ايىپتالعان 16 ادامعا ۇكىم شىققان ەدى.
قازاقستان پرەزيدەنتى قاسىم-جومارت توقايەۆ ارىستاعى جارىلىسقا بايلانىستى قورعانىس ءمينيسترى نۇرلان ەرمەكبايەۆقا قاتاڭ سوگىس جاريالاپ، اسكەري قويماداعى وق-دارىلەردى ەلدىمەكەندەر توڭىرەگىنەن الىپ كەتۋ جونىندە تاپسىرما بەرگەن.
https://youtu.be/5sZIAW_Orz8
