Qorǵanys ministri Ermekbaev qyzmetinen ketýge daiyn
Azattyq suraǵyna jaýabyna Qazaqstan qorǵanys ministri Nurlan Ermekbaev otstavkaǵa ketetini týraly ótinish beretinin málimdedi.
Jambyl oblysyndaǵy tótenshe oqiǵadan keiin Qazaqstan qorǵanys ministri Nurlan Ermekbaev otstavkaǵa ketýdi uiǵarǵan. Ermekbaev bul sheshimin Azattyqqa juma kúni ótken baspasóz máslihatynan keiin málimdedi. Ol jiynda qorǵanys ministri Jambyl oblysy Baizaq aýdanyndaǵy áskeri bólimdegi jarylystan 4 áskeri qaza taýyp, ondaǵan adam jaralanǵanyn jáne birneshe kisiniń habar-osharsyz ketkenin habarlaǵan edi.
Azattyq: Bul siz ministr bolyp turǵan kezdegi ekinshi jarylys qoi. Osy oqiǵadan keiin áleýmettik jelide siz jaily "otstavkaǵa ketsin" degen talaptar aitylyp jatyr. Oǵan ne dep jaýap beresiz?
Nurlan Ermekbaev: Meniń qazirgi basty maqsatym - tez arada apat saldaryn joiý. Al otstavka máselesi týraly aitar bolsaq, men osy [jarylys bolǵany týraly] habardy estigennen keiin birinshi minýtta otstavkaǵa ketýdi surap ótinish beremin degen sheshim qabyldadym. Al qalǵanyn joǵarǵy basshylyq sheshedi.
Azattyq: Demek osy másele sheshilgennen keiin otstavkaǵa ketetinińiz anyq pa?
Nurlan Ermekbaev: Men [ózimdi otstavkaǵa jiberýdi] suraimyn. Al qalai bolady, ony joǵarǵy basshylyq biledi.
Nurlan Ermekbaevtyń sózinshe, áskeri qoimada jarylǵan oq-dáriler osydan eki jyl buryn Arys qalasynan ákelingen.
2019 jyly 24 maýsymda Túrkistan oblysy Arys qalasyndaǵy áskeri oq-dári qoimasy jarylyp, tórt adam qaza tapqan edi. Jarylys bolǵan kúni myńdaǵyn úi zaqymdanyp, Arystyń 40 myńnan astam turǵyny Shymkent qalasy men tóńiregindegi eldimekenderge evakýatsiialanǵan.
Biyl 26 shildede Shymkent qalasyndaǵy áskeri bólimde Túrkistan oblysy Arys qalasyndaǵy áskeri qoimadaǵy jarylysqa qatysty aiyptalǵan 16 adamǵa úkim shyqqan edi.
Qazaqstan prezidenti Qasym-Jomart Toqaev Arystaǵy jarylysqa bailanysty Qorǵanys ministri Nurlan Ermekbaevqa qatań sógis jariialap, áskeri qoimadaǵy oq-dárilerdi eldimekender tóńireginen alyp ketý jóninde tapsyrma bergen.
https://youtu.be/5sZIAW_Orz8
