«اۋلالار مەن قوعامدىق كەڭىستىكتەردى اباتتاندىرۋ بويىنشا اۋقىمدى جۇمىس ءجۇرىپ جاتىر. ماسەلەن بيىل بارايەۆ كوشەسىندە جاياۋ جۇرگىنشىلەر جولى، بەيبىتشىلىك جانە كەلىسىم سارايىنىڭ جانىندا امفيتەاتر، قاراۋسىز قالعان جەرۇيىق-2 ساياباعىنداعى دوستىق گۇلزارى (قحا مۇشەلەرىمەن بىرگە)، مۇعالىمدەر ساياباعى اشىلدى، سول سياقتى قالالىق الاڭ، وڭ جاعالاۋدا بارشاعا بەلگىلى «ۆسترەچا» اۋدانى جانە ت.ب. اباتتاندىرىلدى.
قوعامدىق كەڭىستىكتەر ەلوردانىڭ كوركىن ارتتىرىپ، قالا تۇرعىندارى مەن قوناقتارى ءۇشىن تارتىمدى ورىنعا اينالدى. اباتتاندىرۋ جۇمىسى بارلىق اۋداندا، ونىڭ ىشىندە ەلدى مەكەندەردە دە ءجۇرىپ جاتىر.
ەلدى مەكەندەردىڭ وزىندە سوڭعى جىلدارى 311 اۋلا مەن قوعامدىق كەڭىستىك (ساياباقتار، گۇلزارلار، جەلەكجولدار) اباتتاندىرىلدى. قالامىزدا باس-اياعى 750-دەن اسا اۋلا مەن قوعامدىق كەڭىستىك اباتتاندىرىلدى. اباتتاندىرۋ جۇمىسى مەملەكەت باسشىسىنىڭ تاپسىرماسى بويىنشا «نۇر-سۇلتان – جايلى قالا» ماستەر-جوسپارى اياسىندا جۇرگىزىلىپ جاتىر.
وسىعان دەيىن كوپىر استىنداعى كەڭىستىكتەر اباتتاندىرىلىپ، قۇتقارۋشىلاردىڭ، مەديسينا قىزمەتكەرلەرىنىڭ قۇرمەتىنە ارنالعان ارنايى تاقىرىپتىق الاڭدار، كوشە سپورتىنىڭ كوليزەيى، «تەاترالنىي» بۋلۆارى، «Demalys Promenade» دەمالىس كۇنى كوشەسى جانە ت.ب. اشىلدى. ولاردىڭ ءبارى قالا تۇرعىندارى مەن قوناقتارىنىڭ ۋاقىتىن ءتيىمدى وتكىزۋىنە، جاياۋ جۇرۋىنە ارنالعان.
قوعامدىق كەڭىستىكتەر مەن اۋلالاردا اركىم جانىنا جاقىن ىسپەن اينالىسا الادى: باسكەتبول/فۋتبول الاڭدارى، workout ايماعى، دەمالىستى تىنىش ورىندا وتكىزۋگە ارنالعان ورىندار، بالالارعا ارنالعان الاڭدار، اتكەنشەكتەر، شىعارماشىلىق قويىلىمدارعا ارنالعان ساحنالار جانە ت.ب. ورنالاسقان»، - دەپ جازدى ەلوردا اكىمى.
