قارجى نارىعىن رەتتەۋ جانە دامىتۋ اگەنتتىگى قاداعالاپ سترەسس-تەستىلەۋ (قست) ناتيجەلەرى بويىنشا العاش رەت بانكتەر كاپيتالىنىڭ جەتكىلىكتىلىگىنە بۋفەرلەردى قولداندى، دەپ حابارلايدى Dalanews.kz.
سترەسس-تەستىلەۋ قورىتىندىسى بويىنشا ەسەپتەلەتىن بۋفەردى ەنگىزۋ نەگىزگى جاڭاشىلدىقتىڭ ءبىرى بولدى. ونىڭ مولشەرى تاۋەكەل دەڭگەيىنە قاراي سارالانعان اكتيۆتەر مەن شارتتى مىندەتتەمەلەر سوماسىنىڭ 0%-نان 3%-نا دەيىنگى ارالىقتى قامتيدى. بۇل شەشىم بانكتەردىڭ ىقتيمال ەكونوميكالىق كۇيزەلىستەرگە ورنىقتىلىعىن ارتتىرۋعا جانە بۇكىل سەكتوردىڭ قارجىلىق تۇراقتىلىعىن نىعايتۋعا باعىتتالعان.
قاداعالاپ ستەسس-تەستىلەۋ 2024 ناتيجەلەرى بويىنشا اگەنتتىك ءاربىر بانككە سترەسس-تەستىلەۋ قورىتىندىلارى مەن كاپيتالعا قاتىستى بۋفەر مولشەرى تۋرالى اقپاراتتى قامتيتىن ۇسىنىمدارى بار حات جىبەردى.
ايتا كەتسەك، اگەنتتىك بانك سەكتورىنداعى تاۋەكەلگە باعىتتالعان قاداعالاۋدىڭ كەزەكتى سيكلىن اياقتادى، ول بىرنەشە نەگىزگى راسىمنەن تۇرادى: SREP (Supervisory Review and Evaluation Process) كەشەندى باعالاۋى، اكتيۆتەردىڭ ساپاسىن تۇراقتى باعالاۋ (AQR) جانە قاداعالاپ سترەسس-تەستىلەۋ (قست).
بۇعان دەيىن نەسيە نارىعىنىڭ "قىزىپ" كەتۋىنە بايلانىستى ۇلتتىق بانك كاپيتالدىڭ سەكتورلىق كونترسيكلدى بۋفەرىن ەنگىزۋ تۋرالى شەشىم قابىلداعانىن جازعانبىز. بۇل شارا حالىقتى كرەديتتەۋگە قاتىستى ەنگىزىلەدى جانە حالىقتى كرەديتتەۋ سەگمەنتىندە تاۋەكەل ولشەنگەن اكتيۆتەردىڭ 2%-ى مولشەرىندە بەلگىلەنەدى.
بۇل رەتتە، ەكىنشى دەڭگەيلى بانكتەر اتالعان تالاپتى 2026 جىلعى 1 ساۋىردەن باستاپ ورىنداي باستايدى. وسىلايشا، بانكتەرگە كاپيتالدى جيناقتاۋ جانە جاڭا سەكتورلىق ككب تالاپتارىن ورىنداۋ ءۇشىن 12 ايلىق وتپەلى كەزەڭ بەرىلەدى. بۇل تالاپ بانكتەر ءۇشىن قولدانىستاعى جەتكىلىكتىلىك نورماتيۆىنە قوسىمشا رەتىندە ەنگىزىلەدى.
"قازىرگى ۋاقىتتا بانك سەكتورىنىڭ جاعدايى تۇراقتى دەپ باعالانادى: وتىمدىلىك قورى جەتكىلىكتى، كرەديتتىك پورتفەلدىڭ ساپاسى جوعارى، كاپيتال دەڭگەيى جەتكىلىكتى جانە كىرىستىلىك كورسەتكىشتەرى تۇراقتى. الايدا، حالىقتى كرەديتتەۋ نارىعىندا "قىزىپ كەتۋ" بەلگىلەرى بايقالادى، بۇل كرەديتتەۋدىڭ باسقا باعىتتارمەن سالىستىرعاندا جەكە تۇلعالاردىڭ كرەديتتىك پورتفەلى قارقىندى ءوسىپ كەلە جاتقانىمەن دالەلدەنەدى"، - دەيدى ولجاس كۋبەنبايەۆ.
وسىلايشا، سوڭعى ءۇش جىلدا حالىقتى كرەديتتەۋ كورسەتكىشى جىلىنا ورتا ەسەپپەن 27%-عا وسسە، جەكە كاسىپكەرلەردى قوسا العاندا، بيزنەستى كرەديتتەۋ قارقىنى ورتا ەسەپپەن 17%-دى قۇرادى. حالىقتى كرەديتتەۋدىڭ نەگىزگى وسىمىنە ورتاشا مولشەردە جىلىنا 31%-عا وسكەن تۇتىنۋشىلىق كرەديت بەرۋ كورسەتكىشى ىقپال ەتتى.
ۇلتتىق بانك جۇيەلىك تاۋەكەلدەردى باقىلاي تۇسەدى جانە قاجەت بولسا، بۋفەر پارامەترلەرىن وزگەرىپ جاتقان جاعدايلارعا سايكەس بەيىمدەيدى.
