Qarjy naryǵyn retteý jáne damytý agenttigi qadaǵalap stress-testileý (QST) nátijeleri boiynsha alǵash ret bankter kapitalynyń jetkiliktiligine býferlerdi qoldandy, dep habarlaidy Dalanews.kz.
Stress-testileý qorytyndysy boiynsha esepteletin býferdi engizý negizgi jańashyldyqtyń biri boldy. Onyń mólsheri táýekel deńgeiine qarai saralanǵan aktivter men shartty mindettemeler somasynyń 0%-nan 3%-na deiingi aralyqty qamtidy. Bul sheshim bankterdiń yqtimal ekonomikalyq kúizelisterge ornyqtylyǵyn arttyrýǵa jáne búkil sektordyń qarjylyq turaqtylyǵyn nyǵaitýǵa baǵyttalǵan.
Qadaǵalap stess-testileý 2024 nátijeleri boiynsha agenttik árbir bankke stress-testileý qorytyndylary men kapitalǵa qatysty býfer mólsheri týraly aqparatty qamtityn usynymdary bar hat jiberdi.
Aita ketsek, agenttik bank sektoryndaǵy táýekelge baǵyttalǵan qadaǵalaýdyń kezekti tsiklin aiaqtady, ol birneshe negizgi rásimnen turady: SREP (Supervisory Review and Evaluation Process) keshendi baǵalaýy, aktivterdiń sapasyn turaqty baǵalaý (AQR) jáne qadaǵalap stress-testileý (QST).
Buǵan deiin nesie naryǵynyń "qyzyp" ketýine bailanysty Ulttyq Bank kapitaldyń sektorlyq kontrtsikldi býferin engizý týraly sheshim qabyldaǵanyn jazǵanbyz. Bul shara halyqty kreditteýge qatysty engiziledi jáne halyqty kreditteý segmentinde táýekel ólshengen aktivterdiń 2%-y mólsherinde belgilenedi.
Bul rette, ekinshi deńgeili bankter atalǵan talapty 2026 jylǵy 1 sáýirden bastap oryndai bastaidy. Osylaisha, bankterge kapitaldy jinaqtaý jáne jańa sektorlyq KKB talaptaryn oryndaý úshin 12 ailyq ótpeli kezeń beriledi. Bul talap bankter úshin qoldanystaǵy jetkiliktilik normativine qosymsha retinde engiziledi.
"Qazirgi ýaqytta bank sektorynyń jaǵdaiy turaqty dep baǵalanady: ótimdilik qory jetkilikti, kredittik portfeldiń sapasy joǵary, kapital deńgeii jetkilikti jáne kiristilik kórsetkishteri turaqty. Alaida, halyqty kreditteý naryǵynda "qyzyp ketý" belgileri baiqalady, bul kreditteýdiń basqa baǵyttarmen salystyrǵanda jeke tulǵalardyń kredittik portfeli qarqyndy ósip kele jatqanymen dáleldenedi", - deidi Oljas Kýbenbaev.
Osylaisha, sońǵy úsh jylda halyqty kreditteý kórsetkishi jylyna orta eseppen 27%-ǵa ósse, jeke kásipkerlerdi qosa alǵanda, biznesti kreditteý qarqyny orta eseppen 17%-dy qurady. Halyqty kreditteýdiń negizgi ósimine ortasha mólsherde jylyna 31%-ǵa ósken tutynýshylyq kredit berý kórsetkishi yqpal etti.
Ulttyq Bank júielik táýekelderdi baqylai túsedi jáne qajet bolsa, býfer parametrlerin ózgerip jatqan jaǵdailarǵa sáikes beiimdeidi.
