قىزىلوردا وبلىسىندا كوكتەمگى دالا جۇمىستارىن قارجىلاندىرۋعا 40 ملرد تەڭگە جۇمسالادى، دەپ حابارلايدى Dalanews.kz
ايماقتا «اق ەگىس» ءالداقاشان باستالىپ كەتتى. وسى كۇنگە دەيىن جوسپارلانعان جوڭىشقا ەگىستىگىنىڭ 42%-ى، ماقسارىنىڭ 38%-ى، بيدايدىڭ 77%-ى، ارپانىڭ 25%-ى، جانە قانت قۇمايى ەگىستىگىنىڭ 9%-ى ەگىلدى. ال ءساۋىر ايىنىڭ ءۇشىنشى ونكۇندىگىندە كۇرىش ەگۋ جۇمىسى باستالادى.
– ديقاندار سوڭعى 10 جىلدان بەرى 55 مىڭ گەكتار كۇرىش اتىزىنا لازەرلىك تەگىستەۋ جۇمىستارىن جۇرگىزدى. وسىلايشا سۋدى ۇنەمدەۋ ارقىلى ونىمدىلىك كورسەتكىشىن 30%-عا دەيىن كوتەرۋگە بولاتىنىن دالەلدەدى. بيىل ونى 60 مىڭ گەكتارعا جەتكىزۋ جوسپارلانىپ وتىر، - دەدى وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى تالعات دۇيسەبايەۆ.
باسقارما باسشىسىنىڭ ايتۋىنشا، ەرتەڭ وزبەكستاندا وتەتىن مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ كەزەكتى وتىرىسىندا ۆەگەتاسيا كەزەڭىنە سۋ ءليميتى بەلگىلەنەدى. ەگىس كولەمى سوعان قاراي ناقتىلانادى.
