قىزىلوردا وبلىسىندا ستالكينگ دەرەكتەرى بويىنشا سوت ۇكىمدەرى شىقتى، دەپ حابارلايدى Dalanews.kz.
قىزىلوردا قالاسىنىڭ تۇرعىنى جابىرلەنۋشىنىڭ وزىمەن قانداي دا ءبىر قارىم-قاتىناس ورناتۋعا نيەتى جوق ەكەنىن بىلە تۇرا، توعىز اي بويى مازاسىن الىپ، جۇيەلى تۇردە اڭدىعان.
اتاپ ايتقاندا، جابىرلەنۋشى بىرنەشە مارتە ءوزىن مازالاماۋدى جانە بايلانىس ورناتقىسى كەلمەيتىنىن جەتكىزگەنىنە قاراماستان، سوتتالۋشى ونىڭ تالاپتارىن ەلەمەگەن.
ول الەۋمەتتىك جەلىدەگى پاراقشالارى ارقىلى ۇزدىكسىز حابارلامالار جولداپ، جۇمىس ورنى مەن تۇرعىلىقتى مەكەن-جايىنا بارىپ، جۇيەلى تۇردە اڭدۋ جۇرگىزىپ، بايلانىس ورناتۋ ماقساتىندا پسيحولوگيالىق قىسىم كورسەتكەن.
جابىرلەنۋشىنىڭ ارىزى نەگىزىندە قۇقىق قورعاۋ ورگاندارىمەن ءتيىستى شارالار قابىلدانىپ، سوت ۇكىمىمەن قىزىلوردا قالاسىنىڭ تۇرعىنى قازاقستان رەسپۋبليكاسىنىڭ قىلمىستىق كودەكسىنىڭ 115-1-بابى بويىنشا كىنالى دەپ تانىلدى. وعان 100 ساعاتقا قوعامدىق جۇمىسقا تارتۋ تۇرىندەگى جازا تاعايىندالدى.
بۇدان بولەك وبلىس اۋماعىندا ستالكينگ جاساعان تاعى 2 ازامات سوتپەن كىنالى دەپ تانىلىپ، ءارقايسىسىنا وسى تەكتەس جازا تاعايىندالدى.
ايتا كەتەيىك، 2025 جىلعى 16 شىلدەدەن باستاپ قىلمىستىق كودەكسكە 115-1-باپ ەنگىزىلىپ، ستالكينگ ءۇشىن قىلمىستىق جاۋاپتىلىق بەلگىلەندى.
اتالعان باپقا سايكەس ادامدى جۇيەلى تۇردە قۋدالاۋ، مازاسىز قوڭىراۋلار شالۋ، اڭدۋ جانە ازاماتتاردىڭ جەكە ومىرىنە قول سۇعىلماۋشىلىق قۇقىعىن بۇزاتىن وزگە دە ارەكەتتەر قىلمىستىق قۇقىق بۇزۋشىلىق.
وسى قۇقىق بۇزۋشىلىق ءۇشىن زاڭنامادا ەكى ءجۇز ايلىق ەسەپتىك كورسەتكىشكە دەيىن ايىپپۇل سالۋ، ەكى ءجۇز ساعاتقا دەيىن قوعامدىق جۇمىستار نەمەسە ەلۋ تاۋلىككە دەيىن قاماۋ تۇرىندەگى جازا كوزدەلگەن.
قىزىلوردا وبلىسىنىڭ پروكۋراتۋراسى ازاماتتاردى زاڭ تالاپتارىن قاتاڭ ساقتاۋعا، وزگە تۇلعالاردىڭ جەكە ومىرىنە جانە جەكە كەڭىستىگىنە قۇرمەتپەن قاراۋعا، سونداي-اق قۇقىق بۇزۋشىلىقتارعا جول بەرمەۋگە شاقىرادى.
