بۇگىن «ونەر ورتالىعىندا» 1 مامىر – قازاقستان حالقىنىڭ بىرلىگى كۇنىنە ارنالعان «قازاقستان – دوستىقتىڭ مەكەنى» اتتى سالتاناتتى شارا ءوتتى، دەپ حابارلايدى Dala News.
وعان وبلىس اكىمى نۇرلىبەك نالىبايەۆ، قۇقىق قورعاۋ ورگاندارىنىڭ باسشىلارى، زيالى قاۋىم وكىلدەرى قاتىستى.
ايماق باسشىسى ءوڭىر تۇرعىندارىن بەيبىتشىلىكتىڭ، كەلىسىمنىڭ مەرەيلى مەرەكەسىمەن قۇتتىقتادى.
«مەملەكەت باسشىسىنىڭ باستاماسىمەن، حالىقتىڭ قولداۋىمەن قابىلدانعان جاڭا كونستيتۋسيامىزعا سايكەس، قوعام مەن بيلىك اراسىنداعى بايلانىستى نىعايتۋ ماقساتىندا ەلىمىزدە حالىق كەڭەسى ينستيتۋتى قۇرىلۋدا. بۇل باستاما تۇرعىندارىمىزدىڭ ۇسىنىس-پىكىرىن ەسكەرىپ، ەلدىك ماسەلەلەردى جۇرتشىلىقپەن بىرگە تالقىلاۋعا نەگىزدەلگەن ادىلەتتى قوعام قالىپتاستىرۋدىڭ ماڭىزدى تەتىگى بولماق.
ءبىر جاعادان باس، ءبىر جەڭنەن قول شىعارىپ، جۇدىرىقتاي جۇمىلا بىلگەننىڭ ارقاسىندا ورتاق مۇددە جولىنداعى قيىندىقتاردى قايىسپاي كوتەرىپ، قۋانىشىمىزدى بىرگە ءبولىسىپ، اق نيەتىمىزدى، اسىل قاسيەتتەرىمىزدى تانىتىپ كەلەمىز. بۇل – ءتىلى باسقا بولسا دا تىلەگى ءبىر، ءجۇزى باسقا بولسا دا جۇرەگى ءبىر جۇرتىمىزدىڭ اينىماس بىرلىگىنىڭ دالەلى.
ەلىمىزدەگى ەتنوسارالىق دوستىق پەن بىرلىكتىڭ ۇلگىسىن الەمگە تانىتقان قازاقستان حالقى اسسامبلەياسىنىڭ 30 جىلدىعىنا وراي «قازاتومونەركاسىپ» ۇلتتىق اتوم كومپانياسىنىڭ دەمەۋشىلىگىمەن قالامىزدا 3 ملرد. 800 ملن. تەڭگەگە سالىنعان «دوستىق ءۇيىنىڭ» زاماناۋي، ساۋلەتتى، جاڭا عيماراتى ەل يگىلىگىنە تابىستالدى. بۇل – ايماعىمىزدىڭ بىرلىگى مەن ىنتىماعىن نىعايتۋعا اتسالىسقان ەتنومادەني بىرلەستىكتەر مەن اسسامبلەيا بەلسەندىلەرى ءۇشىن بارلىق قاجەتتىلىكتەرمەن قامتاماسىز ەتىلگەن زاماناۋي عيمارات.
بارشاڭىزدى 1 مامىر – قازاقستان حالقىنىڭ بىرلىگى كۇنىمەن شىن جۇرەكتەن قۇتتىقتايمىن! ەگەمەن ەلىمىزدىڭ ەڭسەسى بيىك، تاۋەلسىزدىگىمىزدىڭ تۇعىرى بەرىك بولعاي!»،– دەدى نۇرلىبەك ماشبەك ۇلى.
سالتاناتتى شارادا بەيبىتشىلىك پەن دوستىقتى نىعايتۋعا، ايماقتىڭ الەۋمەتتىك-ەكونوميكالىق دامۋىنا ەلەۋلى ۇلەس قوسقان ازاماتتارعا وبلىستىڭ قۇرمەت گراموتاسى مەن وبلىس اكىمىنىڭ العىس حاتى تابىستالدى.
مەرەكەدە وبلىستىق كورەيلەر قاۋىمداستىعىنىڭ «حان» بي ءانسامبلى كورەي ءبيىن، «سلاۆيان» ەتنومادەني بىرلەستىگىنىڭ «سۋدارۋشكي» ۆوكالدىق توبى «پرازدنيكي» ءانىن ورىنداپ، كونسەرتتىك باعدارلاما گرۋزين بيىمەن جالعاستى.
وڭىردە 11 ەتنومادەني بىرلەستىك پەن 9 قوعامدىق قۇرىلىم بار. ولار ەتنوسارالىق تاتۋلىقتى نىعايتۋعا، قوعامدىق كەلىسىمدى ساقتاۋعا جانە ەل بىرلىگىن بەكەمدەۋگە باعىتتالعان ماڭىزدى باستامالاردى جۇزەگە اسىرىپ كەلەدى.
اسسامبلەيا جانىنداعى عىلىمي-ساراپشىلىق توپتىڭ قاتىسۋىمەن حالىقارالىق عىلىمي-تانىمدىق كونفەرەنسيا، «سىر ەلى – دوستىق مەكەنى» رەسپۋبليكالىق اسسامبلەيا جاستارى فورۋمى، «دوستىق كەرۋەنى» بايقاۋى جانە «بىرلىگى بەكەم سىر ەلى» رەسپۋبليكالىق فورۋمى ۇيىمداستىرىلدى.
تاتار ەتنومادەني بىرلەستىگىنىڭ 35 جىلدىق مەرەيتويى حالىقارالىق دەڭگەيدە اتالىپ ءوتتى. شاراعا تاتارستان رەسپۋبليكاسىنان ارنايى قوناقتار قاتىسىپ، ەل بىرلىگى مەن شىنايى دوستىقتىڭ ماڭىزىن ايقىنداعان تاعىلىمدى باسقوسۋ بولدى.
قىزىلورداعا ەرەكشە ارحيتەكتۋرالىق ءسان بەرگەن «دوستىق ءۇيىنىڭ» جاڭا عيماراتىندا ەتنوس وكىلدەرىنىڭ جاستارىنا ارنالعان شىعارماشىلىق ۇيىرمەلەرى، مەدياسيا ورتالىعى، مۋزەي، اسسامبلەيا جانىنداعى عىلىمي ساراپشىلىق توپتار جۇمىس ىستەيدى. جاڭا نىسان ازاماتتىق قوعام ينستيتۋتتارىنىڭ باسىن قوساتىن، جاڭا باستامالاردى دامىتاتىن ورتالىققا اينالدى.
بارلىق اۋدانداعى جاڭادان سالىنعان «رۋحانيات ورتالىقتارىنان» مۋزەي، كىتاپحانا، ارحيۆ، نەكە قيۋ زالدارى اشىلعان، ارداگەرلەر مەن انالار كەڭەسىنە، وعان قوسا ەتنومادەني بىرلەستىكتەرگە، ۇكىمەتتىك ەمەس ۇيىمدارعا دا جابدىقتالعان جۇمىس كابينەتتەرى بەرىلگەن. ورتالىقتارداعى «قوعامدىق كەلىسىم» كابينەتتەرى ەتنوس وكىلدەرىنىڭ مادەني-رۋحاني ساباقتاستىعىن ساقتاۋعا قىزمەت ەتەدى.
قىزىلوردا وبلىسى اكىمىنىڭ باسپا ءسوز قىزمەتى
