ۋنيۆەرسيتەت بازاسىندا قۇرىلعان قازاقستاننىڭ جاس پەداگوگ-عالىمدارى قاۋىمداستىعىنىڭ ۇيىتقى بولۋىمەن قولعا الىنعان جوبا ورتا ءبىلىم بەرۋ سالاسىندا باسشىلىق قىزمەت اتقاراتىن ۋنيۆەرسيتەت تۇلەكتەرى مەن ەلىمىزدىڭ پەداگوگيكالىق جوعارى وقۋ ورنىنداعى جاس عالىمداردىڭ ورتاق ديالوگ الاڭىن قۇرىپ، اۋىلدىق جەردە ورنالاسقان مەكتەپتەردىڭ عىلىمي-پەداگوگيكالىق الەۋەتىن كوتەرۋدى ماقسات تۇتادى.
– جاستار جىلى مەن قىزدار ۋنيۆەرسيتەتىنىڭ 75 جىلدىعى اياسىندا قولعا الىنعان جوبانىڭ كوزدەگەن ماقساتى مول. بۇل باستاما – وقۋ ورنى تۇلەكتەرىنىڭ باسەكەگە قابىلەتتىگىن ارتتىرىپ، ولاردىڭ جۇمىسپەن قامتاماسىز ەتۋىنە ىقپال جاسايدى. سونىمەن قاتار پەداگوگتاردىڭ كاسىبي الەۋەتىن جەتىلدىرەدى جانە ءبىلىم بەرۋدە جاڭا تەحنولوگيالاردى قولدانۋدى دامىتادى. ءبىزدىڭ وقۋ ورنى ستۋدەنتتەرىنىڭ باسىم بولىگى اۋىلدىق مەكتەپتەردىڭ تۇلەگى ەكەندىگىن ەسكەرەتىن بولساق، اتالعان ءبىلىم ۇيالارى جاڭا ءبىلىم بەرۋ باعدارلامالارىن تولىققاندى مەڭگەرىپ، جەتە تانىسقانى وتە ماڭىزدى، – دەيدى جوبا اۆتورلارى.
«t2t Networking» جوباسى اياسىندا قازاقستان جاس پەداگوگ-عالىمدارى قاۋىمداستىعىنىڭ مۇشەلەرى الماتى وبلىسىنداعى مەكتەپ مۇعالىمدەرى مەن وقۋشىلارىنا جاڭارتىلعان ءبىلىم بەرۋ باعدارلاماسىنا ارنالعان كەشەندى سەمينار-ترەنينگ ۇيىمداستىردى. ۋنيۆەرسيتەت پەن مەكتەپتىڭ ءوزارا ىنتىماقتاستىعىن ارتتىرۋ ماقساتىنداعى شارا قاراساي اۋدانىنا قاراستى شامالعان اۋىلىنداعى ورتا مەكتەپتەن باستالدى. اتالعان ەلدىمەكەندەگى ءبىلىم ۇياسىنىڭ ديرەكتورى ا. بولىمبەكوۆا وسىنداي يگىلىكتى ىسكە ۇيىتقى بولىپ وتىرعان ۋنيۆەرسيتەت باسشىلىعىنا جانە جاس عالىمدارعا ىزگى نيەتىن جەتكىزدى. سونداي-اق جيىنعا اتالعان ايماقتاعى وزگە دە ورتا ءبىلىم بەرۋ مەكەمەلەرىنىڭ باسشىلارى قاتىستى. وسى ورايدا ايتا كەتەيىك، قاراساي اۋدانىنداعى 21 مەكتەپ ديرەكتورى قىزدار ۋنيۆەرسيتەتىنىڭ تۇلەگى جانە «تۇلەكتەر بايتەرەگى» قاۋىمداستىعىنىڭ ەنداۋمەنت قورىنىڭ قۇرمەتتى مۇشەسى.
جيىن بارىسىندا حيميا عىلىمدارىنىڭ PhD دوكتورى ءمولدىر ابدرايموۆا مەكتەپ باسشىلارى مەن وقۋشىلارعا جانە اتا-انالارعا جوعارى وقۋ ورنى تۋرالى كەڭىنەن مالىمەت بەرىپ، قازاقستان جاس پەداگوگ-عالىمدارى قاۋىمداستىعىنىڭ جۇمىس بارىسىمەن تانىستىردى. ال، فيلولوگيا عىلىمدارىنىڭ PhD دوكتورى، قازاق ادەبيەتى كافەدراسىنىڭ مەڭگەرۋشىسى نارگيزا بالتابايەۆا «جاڭاشا وقىتۋ – زامان تالابى»، «ۇبت-نىڭ جاڭا فورماتى جانە ماماندىقتار تۋرالى تولىق مالىمەت» تاقىرىبىندا شەبەرلىك سىنىبىن جۇرگىزدى. سونىمەن قاتار شارا اياسىندا ۋنيۆەرسيتەت پسيحولوگى ءمادينا قۇربانباي «شيەلەنىستى باسقارۋ»، اعا وقىتۋشى جۇلدىز بازايەۆا «لاتىن گرافيكاسىنا نەگىزدەلگەن جاڭا قازاق ءالىپبيىن ۇيرەتۋ ادىستەرى» جانە PhD دوكتورى شاحيسلام لايىسحانوۆ «عارىشتىق تۇسىرىلىمدەردى پايدالانۋ ارقىلى ەكولوگيالىق ماسەلەلەردى انىقتاۋ» تاقىرىبىندا ترەنينگ وتكىزدى.
جيىن سوڭىندا قازاق مەملەكەتتىك قىزدار پەداگوگيكالىق ۋنيۆەرسيتەتى مەن قاراساي اۋدانىنداعى مەكتەپتەر ءوزارا ىنتىماقتاستىقتى ارتتىرۋ تۋراسىنداعى مەموراندۋمعا قول قويدى. قۇجاتتا ۋنيۆەرسيتەت تۇلەكتەرىن جۇمىسقا ورنالاستىرۋ جانە ولاردى مەكتەپ باعدارلاماسىنا بەيىمدەۋ،بىرلەسكەن ءبىلىم بەرۋ باعدارلامالارىن، وقۋ-ادىستەمەلىك كەشەندەر مەن وقۋلىقتار ازىرلەۋ، مەكتەپ وقۋشىلارى مەن ستۋدەنتتەردىڭ بىرلەسكەن عىلىمي زەرتتەۋلەرى مەن جوبالارىن جۇزەگە اسىرۋ، پەداگوگ قىزمەتكەرلەردىڭ بىلىكتىلىگىن ارتتىرۋعا كومەكتەسۋ سىندى ماسەلەلەر قاراستىرىلعان.
جوبا ۇيىمداستىرۋشىلارىنىڭ ايتۋىنشا، الداعى ۋاقىتتا بۇل شارا ەلىمىزدىڭ وزگە دە وڭىرلەرىندە جالعاسىن تاپپاق.
ايتا كەتەيىك، بيىلعى جىلدىڭ ءساۋىر ايىندا قازاقستاننىڭ جاس پەداگوگ-عالىمدارىنىڭ ءبىرىنشى رەسپۋبليكالىق سلەتى قارساڭىندا وتاندىق جاس پەداگوگ-عالىمداردىڭ قاۋىمداستىعى قۇرىلعان بولاتىن. قۇرىلتايشىسى قىزدار ۋنيۆەرسيتەتى بولىپ تابىلاتىن ۇيىمدى قۇرۋداعى باستى ماقسات – مەملەكەت پەن قوعام دامۋىنا بەلسەندى قىزمەت ەتەتىن، جاڭاشا تۇرعىدا ويلاي الاتىن جاس پەداگوگ-عالىمداردى بىرىكتىرۋ، ولاردىڭ ديالوگ الاڭىن قۇرۋ. سونىمەن قاتار ءبىلىم مەن عىلىم سالاسىنداعى وزەكتى ماسەلەلەر بويىنشا جاس پەداگوگتاردىڭ جۇيەلەنگەن پىكىرلەرىن مۇددەلى تاراپتارعا جەتكىزۋ، وقىتۋ مەن تاربيەلەۋدىڭ ءتيىمدى تەحنولوگيالارىمەن الماسۋ دا قاراستىرىلعان.قاۋىمداستىققا 35 جاسقا دەيىنگى جوعارى ءبىلىم بەرۋ جۇيەسىندە قىزمەت ەتەتىن، پەداگوگيكا سالاسىندا عىلىمي-زەرتتەۋ تاجىريبەسى بار وقىتۋشىلار مۇشە بولا الادى.
جاندار اسان، قىزدار ۋنيۆەرسيتەتىنىڭ باسپا ءسوز ورتالىعىنىڭ باسشىسى
