Qyzdar ýniversitetiniń jas ǵalymdary tyń jobany qolǵa aldy
Ýniversitet bazasynda qurylǵan Qazaqstannyń jas pedagog-ǵalymdary qaýymdastyǵynyń uiytqy bolýymen qolǵa alynǵan joba orta bilim berý salasynda basshylyq qyzmet atqaratyn ýniversitet túlekteri men elimizdiń pedagogikalyq joǵary oqý ornyndaǵy jas ǵalymdardyń ortaq dialog alańyn quryp, aýyldyq jerde ornalasqan mektepterdiń ǵylymi-pedagogikalyq áleýetin kóterýdi maqsat tutady.
– Jastar jyly men Qyzdar ýniversitetiniń 75 jyldyǵy aiasynda qolǵa alynǵan jobanyń kózdegen maqsaty mol. Bul bastama – oqý orny túlekteriniń básekege qabilettigin arttyryp, olardyń jumyspen qamtamasyz etýine yqpal jasaidy. Sonymen qatar pedagogtardyń kásibi áleýetin jetildiredi jáne bilim berýde jańa tehnologiialardy qoldanýdy damytady. Bizdiń oqý orny stýdentteriniń basym bóligi aýyldyq mektepterdiń túlegi ekendigin eskeretin bolsaq, atalǵan bilim uialary jańa bilim berý baǵdarlamalaryn tolyqqandy meńgerip, jete tanysqany óte mańyzdy, – deidi joba avtorlary.
«t2t Networking» jobasy aiasynda Qazaqstan jas pedagog-ǵalymdary qaýymdastyǵynyń músheleri Almaty oblysyndaǵy mektep muǵalimderi men oqýshylaryna jańartylǵan bilim berý baǵdarlamasyna arnalǵan keshendi seminar-trening uiymdastyrdy. Ýniversitet pen mekteptiń ózara yntymaqtastyǵyn arttyrý maqsatyndaǵy shara Qarasai aýdanyna qarasty Shamalǵan aýylyndaǵy orta mektepten bastaldy. Atalǵan eldimekendegi bilim uiasynyń direktory A. Bolymbekova osyndai igilikti iske uiytqy bolyp otyrǵan ýniversitet basshylyǵyna jáne jas ǵalymdarǵa izgi nietin jetkizdi. Sondai-aq jiynǵa atalǵan aimaqtaǵy ózge de orta bilim berý mekemeleriniń basshylary qatysty. Osy oraida aita keteiik, Qarasai aýdanyndaǵy 21 mektep direktory Qyzdar ýniversitetiniń túlegi jáne «Túlekter báiteregi» qaýymdastyǵynyń endaýment qorynyń qurmetti múshesi.
Jiyn barysynda himiia ǵylymdarynyń PhD doktory Móldir Abdraimova mektep basshylary men oqýshylarǵa jáne ata-analarǵa joǵary oqý orny týraly keńinen málimet berip, Qazaqstan jas pedagog-ǵalymdary qaýymdastyǵynyń jumys barysymen tanystyrdy. Al, filologiia ǵylymdarynyń PhD doktory, Qazaq ádebieti kafedrasynyń meńgerýshisi Nargiza Baltabaeva «Jańasha oqytý – zaman talaby», «UBT-nyń jańa formaty jáne mamandyqtar týraly tolyq málimet» taqyrybynda sheberlik synybyn júrgizdi. Sonymen qatar shara aiasynda ýniversitet psihology Mádina Qurbanbai «Shielenisti basqarý», aǵa oqytýshy Juldyz Bazaeva «Latyn grafikasyna negizdelgen jańa qazaq álipbiin úiretý ádisteri» jáne PhD doktory Shahislam Laiyshanov «Ǵaryshtyq túsirilimderdi paidalaný arqyly ekologiialyq máselelerdi anyqtaý» taqyrybynda trening ótkizdi.
Jiyn sońynda Qazaq memlekettik qyzdar pedagogikalyq ýniversiteti men Qarasai aýdanyndaǵy mektepter ózara yntymaqtastyqty arttyrý týrasyndaǵy memorandýmǵa qol qoidy. Qujatta ýniversitet túlekterin jumysqa ornalastyrý jáne olardy mektep baǵdarlamasyna beiimdeý,birlesken bilim berý baǵdarlamalaryn, oqý-ádistemelik keshender men oqýlyqtar ázirleý, mektep oqýshylary men stýdentterdiń birlesken ǵylymi zertteýleri men jobalaryn júzege asyrý, pedagog qyzmetkerlerdiń biliktiligin arttyrýǵa kómektesý syndy máseleler qarastyrylǵan.
Joba uiymdastyrýshylarynyń aitýynsha, aldaǵy ýaqytta bul shara elimizdiń ózge de óńirlerinde jalǵasyn tappaq.
Aita keteiik, biylǵy jyldyń sáýir aiynda Qazaqstannyń jas pedagog-ǵalymdarynyń birinshi respýblikalyq Sleti qarsańynda otandyq jas pedagog-ǵalymdardyń qaýymdastyǵy qurylǵan bolatyn. Quryltaishysy Qyzdar ýniversiteti bolyp tabylatyn uiymdy qurýdaǵy basty maqsat – memleket pen qoǵam damýyna belsendi qyzmet etetin, jańasha turǵyda oilai alatyn jas pedagog-ǵalymdardy biriktirý, olardyń dialog alańyn qurý. Sonymen qatar bilim men ǵylym salasyndaǵy ózekti máseleler boiynsha jas pedagogtardyń júielengen pikirlerin múddeli taraptarǵa jetkizý, oqytý men tárbieleýdiń tiimdi tehnologiialarymen almasý da qarastyrylǵan.Qaýymdastyqqa 35 jasqa deiingi joǵary bilim berý júiesinde qyzmet etetin, pedagogika salasynda ǵylymi-zertteý tájiribesi bar oqytýshylar múshe bola alady.
Jandar ASAN, Qyzdar ýniversitetiniń Baspasóz ortalyǵynyń basshysy
