قىرعىزستاندا بالالاردى زورلاۋ, سونداي-اق ەيەلدەردٸ زورلاپ ٶلتٸرۋ قىلمىستارى ٷشٸن ٶلٸم جازاسىن ەنگٸزۋ قاراستىرىلىپ جاتىر. بۇل تۋرالى Facebook پاراقشاسىندا پرەزيدەنت سادىر جاپاروۆتىڭ باسپاسٶز حاتشىسى اسكات الاگوزوۆ مەلٸمدەدٸ, دەپ حابارلايدى Dalanews.kz.
ەڭگٸمە بالالاردى زورلاعانى ٷشٸن, سونداي-اق ەيەلدەردٸ زورلاپ ٶلتٸرگەنٸ ٷشٸن ٶلٸم جازاسىن ەنگٸزۋ جايىندا بولىپ وتىر. پرەزيدەنت سادىر جاپاروۆتىڭ پٸكٸرٸنشە, ەسٸرەسە بالالار مەن ەيەلدەرگە قارسى قىلمىستار جازاسىز قالماۋى تيٸس.
مۇنداي شەشٸم شىعارۋعا 17 جاستاعى ايسۋلۋۋ مۇقاشەۆانى زورلاپ, اياۋسىز ٶلتٸرۋ وقيعاسى سەبەپ بولدى. قىلمىستى جاساعان دەگەن كٷدٸكپەن بٸشكەكتٸڭ 41 جاستاعى تۇرعىنى ۇستالدى. تەرگەۋدە ول ايسۋلۋۋدى ۇرلاپ, زورلاپ, ٶلتٸرگەنٸن ايتقان. مارقۇمنىڭ دەنەسٸن ىستىقكٶل ماڭىنا كٶمٸپ, كەيٸن قايتا كەلٸپ, دەنەنٸ قازىپ الىپ, بووم شاتقالىنا تاستاعان. قايتىس بولعان قىزدىڭ تۋىستارى كٷدٸكتٸنٸڭ بۇعان دەيٸن دە جىنىستىق زورلىق جاساعانى ٷشٸن جاۋاپقا تارتىلعانىن, بٸراق جازادان قۇتىلىپ كەتكەنٸن مەلٸمدەدٸ.
قىرعىزستان زاڭناماسىندا ٶلٸم جازاسى بۇعان دەيٸن دە بولعان. الايدا 2007 جىلى ول الىنىپ تاستالىپ, ورنىنا ٶمٸر بويىنا باس بوستاندىعىنان ايىرۋ جازاسى ەنگٸزٸلگەن ەدٸ.
