قازاقستان ازاماتى اسا ءىرى كولەمدە الاياقتىق جاساعانى ءۇشىن قىرعىز رەسپۋبليكاسىنان ەكستراديسيالاندى، – دەپ حابارلايدى Dalanews.kz.
ول 2023 جىلعى ماۋسىمدا ادامدارمەن الدىن الا ءسوز بايلاسۋ ارقىلى الماتى قالاسىنداعى بانكتەردىڭ بىرىنە كليەنتتەردىڭ اتىنان بانك شوتتارىنا تىركەلگەن ابونەنتتىك نومىرلەرىن وزگەرتۋ تۋرالى حابارلامالار جىبەرىپ، بانك شوتتارىنا قول جەتكىزگەن.
وسىدان كەيىن كۇدىكتى قاشىقتان قول جەتكىزۋ ارقىلى 5 جابىرلەنۋشىنىڭ شوتىنان "دروپپەرلەردىڭ" بانك شوتتارىنا اقشا اۋدارىپ، ولاردىڭ قاراجاتىن يەمدەنگەن. ونىڭ قىلمىستىق ارەكەتتەرىنىڭ سالدارىنان جابىرلەنۋشىلەرگە 230 ميلليون تەڭگەدەن اسا شىعىن كەلتىرىلگەن.
"بيىل قاڭتاردا ول بىشكەك اۋەجايىندا ۇستالىپ، قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا وتانىنا ەكستراديسيالاندى. ءقازىر كۇدىكتى ۋاقىتشا ۇستاۋ يزولياتورىنا قامالدى"، - دەپ جازىلعان حابارلامادا.
ايتا كەتەيىك، بۇل قىلمىستى جاساعانى ءۇشىن مۇلكى تاركىلەنىپ، بەس جىلدان ون جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەن.
