Qazaqstan azamaty asa iri kólemde alaiaqtyq jasaǵany úshin Qyrǵyz Respýblikasynan ekstraditsiialandy, – dep habarlaidy Dalanews.kz.
Ol 2023 jylǵy maýsymda adamdarmen aldyn ala sóz bailasý arqyly Almaty qalasyndaǵy bankterdiń birine klientterdiń atynan bank shottaryna tirkelgen abonenttik nómirlerin ózgertý týraly habarlamalar jiberip, bank shottaryna qol jetkizgen.
Osydan keiin kúdikti qashyqtan qol jetkizý arqyly 5 jábirlenýshiniń shotynan "dropperlerdiń" bank shottaryna aqsha aýdaryp, olardyń qarajatyn iemdengen. Onyń qylmystyq áreketteriniń saldarynan jábirlenýshilerge 230 million teńgeden asa shyǵyn keltirilgen.
"Biyl qańtarda ol Bishkek áýejaiynda ustalyp, Qazaqstan Respýblikasy Bas prokýratýrasynyń suraýy boiynsha Otanyna ekstraditsiialandy. Qazir kúdikti ýaqytsha ustaý izoliatoryna qamaldy", - dep jazylǵan habarlamada.
Aita keteiik, bul qylmysty jasaǵany úshin múlki tárkilenip, bes jyldan on jylǵa deiingi merzimge bas bostandyǵynan aiyrý jazasy kózdelgen.
