جاقىندا تۇركىستاندا كوكپاردان الەم چەمپيوناتى وتەدى. الايدا بۇل دوداعا باستى قارسىلاستاردىڭ ءبىرى — قىرعىزستان قۇراماسىنىڭ قاتىسپايتىنى بەلگىلى بولدى. وسى تۇستا سپورت ءجۋرناليسى اقىرىس سەيىتقازى كوكپار فەدەراسياسىنىڭ اقپاراتتىق جۇمىسىن سىنعا الدى، دەپ حابارلايدى Dalanews.kz.
“بىر-ەكى كۇندە تۇركىستاندا كوكپاردان الەم چەمپيوناتى وتەدى. سول سىنعا كورشىلەس قىرعىزستان كومانداسىنىڭ قاتىسپايتىنىن ارىپتەسىمىز اسلان قاجەنوۆتەن وقىدىم. وسىعان بايلانىستى ناقتى اقپار الۋ ءۇشىن فەدەراسيامەن بايلانىس ىزدەي باستادىم. سەبەبى كوكپار فەدەراسياسىنىڭ رەسمي اككاۋنتتارىندا قىرعىزستاننىڭ قاتىسپايتىنى جايلى حات-حابار اتىمەن جوق ەكەن. ادەتتە، مۇنداي جاعدايدى فەدەراسيانىڭ ءوزى ءتۇسىندىرۋى قاجەت. ونىڭ ۇستىنە، قىرعىزستان كوكپارداعى باستى قارسىلاسىمىز بولعان سوڭ، سۇراقتىڭ تۋىنداۋى زاڭدى”، — دەپ جازدى ول.
جۋرناليست وسىعان بايلانىستى ناقتى مالىمەت الۋ ءۇشىن فەدەراسيا وكىلدەرىمەن بايلانىسۋعا تىرىسقان. الايدا ولار قىرعىزستان قۇراماسىنا قاتىستى قوسىمشا تۇسىنىكتەمە بەرۋدەن باس تارتقان.
“ۇيىمنىڭ رەسمي وكىلى ساكەن سەيىتحان اتتى ءجۋرناليستى تاۋىپ الىپ، حابارلاستىم. ءبىراق بۇل وكىلدىڭ جاۋاپتارى ەكىۇداي پىكىر قالدىردى. الدىمەن ول قىرعىزستانعا قاتىستى رەسمي جاۋاپتى اسلان قاجەنوۆ ارقىلى جاريالادىق، سوعان الىپ-قوسارىمىز جوق دەدى. سول جەردەن الارسىڭ دەگەنگە كەلتىردى. سودان سوڭ، مانداتتىق كوميسسيا ءالى وتپەگەنىن، سول ءۇشىن رەسمي جاۋاپ جازباعاندارىن ايتتى (قاي سوزىنە سەنەيىن؟). مەن مۇنىمەن كەلىسپەي، فەدەراسيا تاراپىنان رەسمي جاۋاپ تالاپ ەتتىم. سوسىن ول تەلەفون ارقىلى جاۋاپ بەرمەيتىنىن، ۆيسە-پرەزيدەنت اتىنا رەسمي ساۋال جولداۋدى سۇرادى.
كەلىستىم، ءبىراق چەمپيونات انە-مىنە باستالاتىنىن ەسكەرىپ، تەلەفوننان جاۋاپ بەرۋ ىڭعايلى ءارى تەز نۇسقا ەكەنىن ايتتىم. سودان بۇل كىسى مەنىڭ جۋرناليستىگىمە كۇمان كەلتىرە باستادى”، — دەدى ول.
اقىرىس سەيىتقازى بۇل جاعداي ءوزىن تاڭعالدىرعانىن ايتادى. ونىڭ سوزىنشە، قازىرگى ۋاقىتتا بايلانىس قۇرالدارى دامىعان، سوندىقتان تەلەفون نەمەسە ونلاين فورماتتا پىكىر الۋ قالىپتى تاجىريبە.
“ويلاڭىزشى، ۆيسە-پرەزيدەنت ءسىزدى تانىمايدى. تانىمايتىن ادامعا تەلەفونمەن قالاي جاۋاپ بەرەدى؟ اسلان سياقتى كەلىپ، سۇراپ المايسىز با؟"، - دەدى.
بىرىنشىدەن، مەن ءوزىمدى تولىق تانىستىردىم، سپورت ءجۋرناليسى، Sportbugin.kz سايتىنىڭ رەداكتورى ەكەنىمدى ايتتىم.
ەكىنشىدەن، مەنىڭ ايماقتارعا بارىپ جۇرەتىن مۇمكىندىگىم از. چەمپيوناتقا باراتىن مۇمكىندىك تە جوق. ونىڭ ۇستىنە، ءقازىر بايلانىستىڭ نەشە ءتۇرلى ءتاسىلى دامىدى. ءتىپتى، ميلاندا جۇرگەن شايدوروۆتىڭ باپكەرىنەن دە الماتىداعى ۇيىمدە وتىرىپ سۇحبات الدىم. سوندىقتان، مىنا تۇرعان تۇركىستاننان تەلەفونمەن جاۋاپ بەرۋ ەش اعاتتىق ەمەس.
ۇشىنشىدەن، بۇل كىسى مەنى تومەندەتىپ، الالاپ تۇرعانداي اسەر قالدىردى. "ۆيسە-پرەزيدەنت ءسىزدى تانىمايدى، قالاي جاۋاپ بەرەدى" دەگەنى وسىنداي ويعا جەتەلەيدى. ياعني، كوكپار فەدەراسياسى تەك تانىمال جۋرناليستەرمەن عانا جۇمىس ىستەيدى دەگەن ويدا قالدىم”، - دەپ قوستى ول.
سونىمەن قاتار ول فەدەراسيا وكىلى ءوزىن “پروۆوكاسيا جاساۋعا تىرىسىپ وتىر” دەپ ايىپتاعانىن جازدى.
“ال مەن بار بولعانى: “قىرعىزستان نەگە قاتىسپايدى جانە بۇل تۋرالى نەگە رەسمي مالىمدەمە بولمادى؟”، - دەدىم”، - دەيدى جۋرناليست.
اقىرىس سەيىتقازى قازىرگى ۋاقىتتا فەدەراسياعا رەسمي ساۋال جولداعانىن جانە جاۋاپ كۇتىپ وتىرعانىن حابارلادى.
“جاۋابىن كۇتەلىك، قاشان كەلەتىنىن بىلمەيمىن. ءبىراق وسى الەم چەمپيوناتى تىم اسىعىس جاسالىپ جاتقانداي اسەر قالدىردى. چەمپيوناتتىڭ وتەتىنى جايلى ءبىر اي بۇرىن عانا حابارلاندى. بۇل ۋاقىتتا كىم دايىندالىپ ۇلگەرەدى؟”، - دەدى ول.
ايتا كەتەيىك، بۇعان دەيىن قىرعىزستان تاراپى دا جارىسقا شاقىرۋ كەش جىبەرىلگەنىن ايتىپ، تولىققاندى دايىندىققا ۋاقىت جەتپەگەنىن مالىمدەگەن. ولاردىڭ سوزىنشە، مۇنداي دەڭگەيدەگى جارىسقا قاتىسۋ ءۇشىن تەك ويىنشىلاردى ەمەس، اتتاردى دا الدىن الا دايىنداۋ قاجەت.
“ودان بولەك، قىرعىزستان كوك-بورۇدەن وزدەرىنىڭ ەڭ اۋقىمدى جارىسىنا دايىندالىپ جاتىر. چەمپيوناتتى سوعان تۇسپا-تۇس قويۋ دا – قاتەلىك”، - دەپ قوستى جۋرناليست.
جۋرناليست تاعى ءبىر جايتقا نازار اۋدارعان.
“ءبىر قىزىعى، چەمپيونات قارساڭىندا كوكپاردان ۇلتتىق قۇرامانىڭ باس باپكەرىن اۋىستىرىپ جىبەرگەن. مۇندا دا قانداي لوگيكا بارىن بىلمەدىم.
ال ايداربەك قوجانازاروۆ باسقاراتىن فەدەراسيانىڭ باق-پەن جۇمىسى مۇلدە كوڭىل كونشىتپەيدى”، — دەپ تۇيىندەدى ول.
